زبور عجم حصّہ اوّل مانتا محترم بزرگ برادر علی اکبرعباس نے ٹیلی فون تے حُکم دتا پئی ’’زبور عجم‘‘ دا جیہڑا پنجابی ترجمہ اوہناں نے کیتا سی۔ محترم سہیل عمر صاحب اقبال اکادمی ولّوں نظر ثانی لئی تینوں بھجوا رہے نیں تے مینوں حیرت ہوئی کیوں جے ساڈے ایتھے وڈے بھرا چھیتی کر کے چھوٹیاں بھراواں نوں اینا مان نہیں دیندے پئی اوہناں نوںاپنی کوئی تخلیق چھپن توں پہلوں سنا دین یا وکھا دین یا اوہناں دیاں لکھتاں نوں ویکھ لین۔ ایہہ رواج ساڈے گھر ہلے تیک ہے وے ایس کرکے جدوں میں وڈے بھاء جی دی گل سُنی تے میں حیرانی دے نال نال پریشانی وچ وی ڈُب گیا پئی اک پاسے علامہ اقبال دا فارسی کلام تے اُتّوں ترجمہ وی وڈے بھرا ہوراں دا جے میں دوواں وچکار پھس کے رہ گیا تے کھوبے وچ پھسن والی گل بن جائے گی۔ تھوڑے چِر مگروں ای محترم ڈاکٹر طاہر حمید تنولی ہوراں دا لکھیا ہویا حُکم نامہ وصول پایا تے نال ای کتاب وی جیہدے وچ لوڑ موجب ردّوبدل کرن دی وی اجازت سی۔ میں کتاب پڑھی تے فیر ’’زبورِ عجم‘‘ دے فارسی نسخے نوں ساہمنے رکھ لیا۔ بی اے فارسی آپشنل توں اگے میرا فارسی نال کدی کوئی واہ نہیں سی پیا۔ اُنج وی میں پڑھن لکھن وچ کورا ای آں۔ ایویںاپنے ابا جی نوں خوش کرن لئی چار جماعتاں رِڑھدیاں کُھڑدیاں پڑھ کے وڈیاں دی نقل وچ شاعری شروع کر دتی سی پر شاعری کرنی اج تک وی نہیں آئی۔ ایسے کر کے نہ شاعری وچ کوئی تیر لگا نہ نثر وچ کوئی تُکا۔ ہُن جہالت توں گُھنڈ لتھن دا ویلا آ گیا سی ایس کر کے اللہ دا ناں لے کے ڈردیاں ڈردیاں کم شروع کر دتا۔ شروع شروع وچ تے بھائی جی دے حُکم دے مطابق املاء دیاں غلطیاں تک ای رہیا پر جوں جوں اگے ودھدیاں اپنی دلچسپی ودھی تے فیر میں کِتے کِتے اپنے من بھانے کارے وی کیتے۔ فنِ شاعری تے عبور نہ ہوون پاروں اوکڑاں وی ساہمنے آئیاں۔ پر اک گل ضرور کِتے پڑھی سی جہڑی ایس ویلے یاد آ گئی پئی ترجمہ اپنی جگہ اک مکمل تخلیقی فن اے تے جس کسے زبان دا دوجی زبان وچ ترجمہ کیتا جاندا اے ضروری اے پئی مترجم دوواں زباناں دے الفاظ دے تہذیبی پس منظر توں واقف ہووے تے جس زبان وچ ترجمہ کر رہیا اے اوہدے الفاظ و محاورات تے روز مرّے نوں اصلی متن دے لاگے لاگے رکھن دی صلاحیت رکھدا ہووے پر ایہدا مطلب ایہہ نہیں بئی اصلی متن وچ کہی گئی گل جے ترجمے والی زبان وچ واضح نہ ہوندی ہووے تاں وی اوہ اصلی متن دے نیڑے رہ کے تے ترجمہ کر کے پرانہہ مارے بھاویں پڑھن والیاں نوں سواد تے سمجھ آوے نہ آوے۔ ترجمے دی زبان وچ اکھراں دی ورتوں انج دی ہونی چاہیدی اے پئی ویکھن وچ اوہ، اصلی متن دے لفظی ترجمے نال بھاویں لَگّا نہ کھاندے ہون پر اوہ اصلی متن وچ کہی گل دی روح تے مقصد نوں کھول کے بیان کرن و چ پورے اُترن مثلاً: من اگرچہ تیرہ خاکم دلکے است برگ وسازم بنظارۂ جمالے چو ستارہ دیدہ بازم ترجمہ: من بھانویں ہے انھّی مٹی دل وچ دھڑکے دھڑک مری تیری دید دا حُسن نظارا بنیا اکھدی رڑک مری ؎ بہ ہوائے زخمۂ تو ہمہ نالۂ خموشم تو بایں گماں کہ شاید زنو افتادہ سازم ترجمہ: تیری وا دے بُلہیاں نوں پئی میری چُپ اُڈیکدی اے توں سمجھیں کہ خالی خولی رہ گئی خورے بڑھک مری خورے کسے پڑھن والے نوں پہلی واراں پڑھدیاں متن تے ترجمے وچ کوئی ربط نظر نہ آوے پر سمجھ کے پڑھن نال دوواں دا مقصد تے روح کُھلھ کے ساہمنے آ جائے گی کیوںجے میں لفظی ترجمہ تے انحصار کرن دی تھاں اقبال دے فکری فلسفے تے اوہدے الفاظ دے اوہلے نوں زیادہ توں زیادہ ساہمنے لیاون دی کوشش کیتی اے تے نال ای فارسی زبان وچ پائی جاون والی چاشنی تے سلاست نوں برقرار رکھن دا چارا کیتا اے۔مثلاً پیش تو نہادۂ ام دلِ خویش شاید کہ تو اِیں گرہ کُشائی! ترجمہ: دل لیا رکھیا تیرے پیراں وچ کیہ لئیں گا گنڈھ کُھلوائی دا بہرحال میں اپنی بساط تو ودھ کم کرن دی کوشش کیتی اے جہنوں تسی پنجابی زبان دے محاورے مطابق ’’…… شہتیراں نوں جپھے پاون ‘‘دا ناں وی دے سکدے او۔ پر ایہدے تو نظر نہیں ہٹا سکدے کیوں پئی جپھے پاون والی دا کیہ پتا کدوں تہاڈے اُتے آن ڈگے تے تہاڈا تراہ کڈھ دیوے۔ پر میرے بھاء ہوراں جیہڑا میرا تراہ کڈھیا کتاب دی آخری غزل تے آخری شعر تک اپڑدیاں میں اوہدے توں کِنا کُو باہر آ گیا ساں اوہ تسی ایہ شعر پڑھ کے اندازا کر سکدے او:۔ ؎ یا درِ بیاضِ اِمکاں یک برگِ سادۂ نیست یا خامۂ قضارا تابِ رقم نماندہ ترجمہ: یا کدھرے اِمکان کتابے کورا کاغذ بچیا نہیں یا انج اے پئی قلم قضا دا اکھّر نہیں لکھ سکدا اوہ شاعر ی تے فارسی زبان دی الف بے توں انجان ہوون پاروں بھُل چُک معاف! اخیر تے میں محترم جناب سہیل عمر صاحب تے محترم جناب ڈاکٹر طاہر حمید تنولی صاحب دا بے حد شکر گزار آں جہناں نے میرے ورگے کم علم آدمی نوں اینا مان دتا تے اک اجیہاموقعہ وی، جہدے نال مینوں علامہ دی فکری اساس بارے ہور جانکاری ہوئی تے جہدے پاروں میں ایہ آکھ سکنا کہ میں وی علامہ دے فکر ِ سمندر وچوں چڑی ہار چنجھ بھر آبِ حیات چکھیا اے تے ایہ بڑی گل اے۔ تہاڈیاں دُعاواں دا منگتا علی اصغر عباس بسم اللہ الرحمن الرحیم زبور دے پڑھن والیاں لئی کدی تے اکھ دے پردے اگے ککھ دی اوٹ بنائی کدی اس اکھ وچ آ جاوے دو عالم دی اشنائی دور دراڈیوں کدی کدائیں عشق دی وادی مُڑوی اکو آہ تے ساہ وچ سو ورھیاں دی واٹ مُکائی دل وچ رکھ طلب نوں پکا ہتھ وچ آس پکیری کدی کدی ایہ دولت انجے راہ جاندے ہتھ آئی دُعا سینے دے وچ دل با خبر دے مولا خاص جناب چوں نالے انج دی اکھ عطا کر جہڑی تک لئے نشہ شراب چوں بندا اپنے جیون دے لئی دوجے توں ساہ منگدا نہیں میری ہک چوں پھُٹدی آہ نوں دے نور سویر دی آب چوں میرے کانگ دے زور نوں ایویں نہ رجباہیاں ول ٹور میرے لئی توں راہ بنا دے وادی ٹبے ڈھاب چوں میرا جوڑ پوایا ای مالکا جے توں ہرے سمندراں نال سُچے موتی وی ڈھلکادے لہر دے پیچ و تاب چوں شکرے باگھ شکار نیں میرا، دے ہمت ہور ودھیر جے پنجے وچ پھس جائے کوئی نہ نکلے ایہدی داب چوں میں ٹُریا کرن شکار ہاں تے اوہ وی پنچھی حرم دے بن تیر چلایاں تیر دا کم بن جائے ہور حساب چوں میری مٹی کوک دائودی نال بھڑکے لاٹ و لاٹ میرے ذرے، اُڈدیاں چننگاں، جیویں نکلن اکھ عقاب چوں ۱ میرے پھٹر سینے دے وچ آیا سوز تے ساز کتھوں کچی مٹی دے اِس بھانڈے پایا ایہہ انداز کتھوں من لِتا جگ مٹی دا اے اِس وچ میری خاک وی ہے ذرّے ذرّے وچ ایہ کھوجی لبھّن آیا راز کتھوں جھات مری جھُم تاریاں دا وی گلواں چیر کے لنگھدی اے کتھے میرا جَھل پُنا، پئی رولے دی آواز کتھوں ۲ چھیڑ غزل تے اوہو ای بیتی وتری کوک پکار بُجھے دِلاں نوں ملے دلاسا کر کجھ انج وچار کیہ مندر کیہ گرجا، کعبہ یا مسجد، بُت خانہ ادھ میچی تُوں اکھیوں کھولیں فتنے کئی ہزار میری مٹی وچ رَل کے جس بھانبڑ مچ مچایا اِنج دا بھرا پیالہ منڈیاں نوں وی دے سرکار کُوک اجیہی ہُوک پئی ہِک وچ دل دی پوے دھمال پی شراب اوہ جیہڑی درد نوں دیوے ہور نکھار عجم دے بیلے تڑکے تڑکے تیز ہواواں جھُلّن لپکے بھانویں اک چنگیاڑا چھوئے ساز دا تار ۴ توں ایں ہا پکار چ دتی تتی تت ودھا میری واج تے ورہے ہزاراں سُتی خاک جگا میں جاناں جو دل تے بیتی پی کے جند شراب سِلّا خاک پیالہ بھریا شوق دی مستی پا دل پھڑیجی ڈوڈی دی من گنڈھ میں کھول سکا لالے پھُل دا داغ ہرا کر دیوے مست ہوا سورج، چن تے تاریاں کولوں، خیال اڈاری اگّے ستے ستائے ایس غزال دے گل وچ پھاہی پا منگتے ول اک نظر کرم دی خواجہ جی لجپال ہور کسے نہیں پیالہ بھرنا وگے بھویں دریا ۵ مٹھ بھر مٹی دا کُرلاٹا دس پائے بے وس دا شہ رگ توں وی نیڑے ہو کے تھوہ ناں دئیں کن رس دا بُکّل مار صبا دی آویں باگے وچ لُک چھُپ کے خشبوواں دے اوہلے بہہ کے پھُلّاں دے وچ ہسدا مغرب تیتھوںبے گانہ ایں مشرق نرا فسانہ ویلا ای ہُن جگ نوں دیویں مزا جلوے دی چَس دا جیہڑا بھُوتر کے دنیا نوں ٹُرے مٹاون لئی مار چنگیزی نشتر اوہدے، مزا لوے اَڑ پھَس دا آپوں ای بے مہارا ہو کے میں ناں کدھرے نسّاں اپنی زُلف دا پھندہ کیوں نئیں دھون مری وچ کَس دا میں ہاڑے بِن کجھ نہ جاناں جگ بھانے میں غزل کہواں وانگ تریل ایہہ ہک تے میری مینہ کِنج دا اے وس دا ۶ من بھانویں ہے انھّی مٹی دل وچ دھڑکے دھڑک مری تیری دید دا حُسن نظارا بنیا اکھ دی رڑک مری تیری وا دے بُلہیاں نوں پئی میری چُپ اُڈیکدی اے توں سمجھیں کہ خالی خولی رہ گئی خورے بڑھک مری کدی ضمیر دی جھوک دے اندر انج دی نوری لاٹ لگا خاکیاں دا جے دل لشکاوے نوری پاون پھڑک مری توں عشقے دا سوز کیہ جانیں عشق تے مان ایں خاکی دا تیری بے نیازی تک نہیں جاندی کچی سڑک مری اوہلے دی گل کسے نوں دسی نہ ای اوہلا رکھیا میں غزلاں دے سُر انج دے چھیڑے بولے گل بے دھڑک مری ۷ درد بھری سُرتال چ پہلوں بولے مٹھڑے بول تیہہ دی ماری جند شراب فِر پھڑ کے دتی ڈوہل توں دتا ایس نمانے تے بوہا اوس جہان دا کھول آس نراس کتاب دا دل نہ تکیا ورقہ پھول سُرمے والی اکھ نیں کیتے دل تے جگر شکار کیہ نِگہ جیہنے دو شکار دتّے اِکّو تیر اچ تول تک جلوہ بھری بہار دا ہوئی اونتری اکھ بے تاب تری دید دی سِک وچ بیلیاں دتے صحرا باگ پھرول کیہ نواں اے جے اک تخت تے دو شاہ مل نہ بیٹھن ہے عجیب فقیر نوں دو جگ سوڑے پین اڈول ۸ چھڈ کفر تے دین دا جھیڑا رحمت عام وسا کھول دے پورے چن دا چانن گُھنڈ مُکھڑے توں چا چھیڑ پرانا گیت تے کردے دور شراب دا تیز فیر پُچھیں تُوں ساتھوں اپنے جام دی اگ دا بھاء موڈھے زلفاں جال وچھا کے باگے کیوں جاناں ایں ویکھ بنیرا اپنا، اُتّے بیٹھے پنچھی پھا کربل پئی اُڈیکدی، اُگّی کھیت حجاز تریہہ رَت حسینؓ دی منگدے پئے نیں شام تے کوفہ مار کے موڈھا لنگھ جاندا اے کلّم کلّا اَگّے عشق کدی وی واگ نئیں دیندا دُوجے ہتھ پھڑا بے خبری وچ بت خانے دی درزل مَل کے رویا اپنا آپ پچھاتا تے فیر کعبے آن کھڑا پھُلّاں بھری بہار دی دس پیا پاندا پنچھی بولے پنجرے دے وچ ڈکیا بیٹھاں، وائے گل سُن جا ۹ جس پاروں واج پُر درد ہوئی، ڈر لتھا، غم ودھیر ہویا وا جھُلّی صبح سویر دی یوں، چنگیاڑا اگ دا ڈھیر ہویا نئیں عشق دے کول سامان میاں، اک شیشہ ہتھ وچ پھڑ ٹُریا جیہڑا پاک اے رَت پرویزی توں، ہک چیر پہاڑ دی شیر ہویا مرے دل وچ کُھب کے رہ گئی اے گل رمز شناس سیانڑے دی مِٹھی گل معشوقاں دی ماردی نہیں، تیر اکھ دا کٹر کٹیر ہویا جھٹ آ سرہانے توں کول بہہ جا درد ہجر فراق دا ودھیا ای تیری محفلے خالی جوکر آیا اوہ جام لبالب فیر ہویا داغ تیرے وچھوڑے دے باغ اندر بیٹھ کھولے تے انج دی اگ پھڑکی پھُلاں لگا ترونکا تریل دا سی، تیل بن کے اَت گھنیر ہویا گُجھے گُجھے اشاریاں گھر پٹیا تاہنگ فیر دلے وچ دید دی اے آس لائی اوہ زلف دی چھاں ویکھاں جیہدے نال اے گھپ ہنیر ہویا گھر دونواں دا پانی مٹی دے وچ ایس اوہلے چ خورے کیہ بھیت لُکیا راس آندی عقل نوں ایں خاک صحبت، دل اوس لئی پُت متیر ہویا مینوں ویکھو پئی ہور نہیں میرے جیہا ہندوستان دے وچ پُت باہمنا دا جیہڑا مولانا روم دی رمز جانیں اتے شمس تبریز توں ڈھیر ہویا ۱۰ میرے دل تے اکھ وچ رہندا بس ویکھن دا چا کیہ گناہ جے پتھر کٹ کے بت اک لیا بنا مکھڑے نوں کَجھ گھنڈ وچ رکھیں نظر دی جھال نہ جھلیں روواں نہ تے میریا چنّاں دس کوئی ہور اُپا کیہہ جاندا جے میرے ویہڑے پیر کدی توں پاویں مجمانی لئی نکا جیہا دل ہے بھجا ٹُٹا غزل میں گا کے سمجھیا انجے ای دل نوں ملے قرار پر چنگیاڑا اُڈ کے لاٹ دا سیک نہ سکے گھٹا دل اجیہا دتا زندہ سہے نہ مول حجاب پتھر چوں چنگیاڑا تک لئے انج دی ملے نگاہ میرے دل دا ٹوٹا ٹوٹا مستیا حصہ لے کے کیویں ہزاراں ٹوٹیاں وچ توں اپنا غم ونڈیا مارو موجاں ولّے تے اوہ بیڑی کدی ناں کھہندے کنڈھے بہہ سلامتی عشق نوں خطرہ اے دسدا بے نیازی شان نال انج میں بادشاہاں چوں لنگھیا چودھویں دا چن تاریاں وچوں جسراں لنگھ گیا ۱۱ منیا پئی عقل دے باز دی اُچی بڑی اُڈاری اے پر ٹِبیاں وچ گھاتیں بیٹھا پکا اک شکاری اے اوہ جیہڑا کم اچ اڑچن دی گنڈھ کھولے راہ کڈھ لئے گاون والے حوصلے وچ وی اوسے دی فنکاری اے گل کرن نوں جی کردا اے پر محرم نئیں لبھدا سینے دے وچ چکی پھردا بھیت وی کوئی بھاری اے سو ڈھنگاں تے سو اگاں نال بھانویں مینوں بھنیا اے فیروی صدقے اس اگ دے میں جس دی لذت پیاری اے موئی مٹی دے بھاگاں نوں ملیا جیوندا جاگدا دل کتھے میں تے کتھے ایہہ دل، تیری لیلا تیاری اے سینے دے وچ لاٹ جو بلدی اوہو ای گھر دا چانن ایں گھر نوں ساڑ اُجاڑ کرن دی ہور اک لاٹ دی واری اے افلاطون دی جگ جانوں اس عقل دا کوئی بھروسا نہیں میری بُکلے شوخ اوہ دلڑی، جس دی نظر کٹاری اے ۱۲ مینوں جاپدا ترا جہان سارا بت خانہ ایہہ میرے خیالاں دا اے مان متیا اے ایہدا ہر اک جلوہ رہن رکھیا میری نگاہاں دا اے پئے گُھمدے رہن آفاق کدھرے میری اک نگاہ چوں باہر تے نہیں دَیرہ کھچ دتا جد پرکار میری سبھو کِیلیا فیر ایہناں راہاں دا اے حُسن تیرا، حیاتی تے موت ہے وے میرے تکنے تے ان تکنے نال ایہہ سبھ زمان، مکان کیہ اے؟ سارا شوخ پنا میری سوچاں دا اے سیر، سکون تے غیب حضور سبھو کھیل کھیلنیاں میرے دل دیاں نیں ایہناں رمزاں اشاریاں نال ایہو، کھولنہار میرے سارے بھیتاں دا اے جیہڑی شے وی بیجی جہان اندر اوڑک اوسے نوں ای فیر کٹنا ایں میری تسبی تے میرے جنیو نال ای کتے تار کتے نُور بھاگاں دا اے میں اوہ ساز ہاں ہتھ تقدیر دے وچ سو نغمے نیں میرے سریر دے وچ جتھے تنکدی فکر اے ناخچے نوں، اوتھے ہوند پکا میرے تاراں دا اے ربا! فیض تِرے تھیں میں ہاں جیوندا دس اپنا پتہ نشان کدھرے؟ ایہناں دونہاں جہاناں تے مل میری، ترا اپنا وی ہے کوئی جہان کدھرے؟ ۱۳ گئی رُت بہار دی آ ایسی، مٹھی بُلبُل دی پئی صدا ایسی ہتھ جام، لباں تے غزل ہووے، گُھنڈ لاہ تے دید کرا ایسی ہنجو ٹپکدے میرے توں ویکھ تے سہی اک وار ایس اپنی نگاہ دے نال سٹ بجلیاں تے ساڑ پھُوک دے توں، میرے بیلے تے اگ ورھا ایسی آکھ وا بہار دی نوں جائے لے کے میرے ڈوہنگے خیالاں دے پھُل بوٹے ونڈے گھاٹیاں تھلاں دے وچ جا کے، فیر دیوے بہار کھڑا ایسی جنگل بیلے چ پُنگردا ہر بُوٹا میرے ساہواں دے نال ہرا ہووے تیرے باگ دے پھُلاں تے کنڈیاں وچ گیا جند میں اپنی لنگھا ایسی مٹی پانی دے ایس جہان نوں تُوں میرے دل دی کسوٹی تے کَس کے ویکھ سارا کھرا کھوٹا ایہدا مندا چنگا کھل جائے گا پرکھ بنا ایسی دل کسے دے اگے نہ ہاریاں میں بنی دونہاں جہاناں دے نال جو نہیں ہُن پہنچاں گا تیرے حضور وی میں دن حشر دے لے کے ادا ایسی اک پرانی گھکارنی گھگھی نے جد سنی میری کرلاٹ تے کہن لگی بیتے سمے دا گیت ایس چمن اندر کسے گایا نہیں لا صدا ایسی ۱۴ ایس شوہ حیاتی دی چھل وچوں کسے کھچ کے کڈھیا اے باہر مینوں کیہڑی کیہڑی اے گھنڈی اوس کھول چھڈی دتا رضا مقام سنوار مینوں زور لایا گویڑ بنا بدھے وڈے عشق نے اس مارو کھیت اندر بی پایا گوایا ہزار کدھرے تد پجیا آن کے یار مینوں میں نہیں جاندا اوس نگاہ نے کیہ ویکھ لتا ہے میری اس دھوڑ اندر گھڑی مُڑی زمانے دی وٹی اتے پیا رگڑدا وانگ سنار مینوں ککھاں کانیاں دی نکی جیہی دنیا دے وچ کسراں آزمان لئی دے کے دلڑی ایہ اک چننگ ورگی لیا سٹیا اے ہُن وچکار مینوں پھڑ لوو پیالہ میرے ہتھ وچوں ہُن لگدا اے جویں کھیڈ مُکّی کر کے شو بازی میتھوں کھوہ لتا میرے سوہل ملوکڑے یار مینوں ۱۵ ہُن تریہائی مٹی تے اج چھڑک شراب حیاتی دی اپنی لاٹ اُچیری کر تے ٹھنڈی کر چننگ میری میخانے مٹکے خالی نیں تے سنگیاں حال وسار لئے نرے ککارے ہین مسیتے، پِڑاں اچ اگ اے بھُبھل جیہی سوچاں بندی کیہ گنڈھ کھولن دین دی مُکّی گلیں باتیں سینے اندر دل اُتے وی سیدھ لگان دی جا نہ رہی اک منزل ول دونویں ٹُردے دونویں ہین نیں موہری عقل دلیل دے حیلے کھچے عشق گھسیٹے بدو بدی عشق تے ست اسماناں دا وی تنبو لیر و لیر کرے ایہدے ہتھ ودھاون نال ای تاریاں جھُم طناب پھٹی ۱۶ تینوں پیا بھلیکھا ہے ایہ خورے آستانے دا رہندے خیال مینوں بھوندا پھردا ہاں ایس دوار جے میں کم کار اے مالک دے نال مینوں رنگت اُڈیا بھانویں شرار ہاں میں میرے جلوے توں انج ولا نہ تُوں لشک میرے وچ بھانویں ہے دو پل دی بخشے ایہو چمک لازوال مینوں جیہڑی راہ توں کدی میں لنگھ جاواں فیر پرت کے اوس نوں ویکھدا نہیں کھوج بھلکے سویر دی دس پاون اوندی آپ زمانے دی چال مینوں بحر عشق دا ای میری بیڑی وی اے بحر عشق ای میرا ہے یار کنڈھا غم کوئی وی بیڑی نہ ہوونے دا نہیں نہ ای کنڈھے دا ہے کوئی خیال مینوں میری اگ تے اگ تُوں اپنی سٹ، انج سٹ پئی ساڑ سواہ کردے نواں نواں جو ہاں تیرے چاہن والا آشیانے دا رہندے ملال مینوں ایسے آس اُڈیک چ ہاں بیٹھاں کسے دن توں کرن شکار آویں نسّا پھردا ہاں وانگ غزال بچدا پھاہ لین نہ شاہاں دے جال مینوں جے توں کرم کماویں تے بخش دیواں دو تن جام میں وی ایناں سنگیاں نوں رات والی شراب پئی جاپدی اے وچ دلاں دے لاٹ، مثال مینوں ۱۷ نظر مَل راہواں بہہ کے ویہندیو ای رہی گھوڑی چڑھ سوار کولوں لنگھ گیا کرو کوئی سمھالن دا ہُن چارا میرا کارا تے کار سگوں لنگھ گیا دسّاں دوجیاں نوں بول، بول کے کیہ دتا یار نیں جلوہ اے کنج مینوں پلک جھپکدیاں وانگ شرار دے اوہ اک تارا نظر وچوں لنگھ گیا اوہدی منزل دی راہ خورے ہے اوکھی چن ماہی دِسے پیا اوکڑاں وچ عشق گنڈھ چُکّی تارا موڈھیاں تے لشک ماردا لاگیوں لنگھ گیا کوئی اوہلا اسمان دے پردیاں دا میری آس اُمید نوں توڑدا نہیں میری اکھ نظر دا اوہ تیر رکھدی بِنا پھاڑیوں پتھروں لنگھ گیا میری تاہنگ تریل دے موتیاں وچ ٹھاٹھاں مارن سمندر تے جُھم تارے توڑے عشق دی موج پئی کنڈھیاں نوں کنڈھا ٹُٹ کے آپ حدّوں لنگھ گیا جدوں یار ملے کدی کلّیاں وچ اکھّاں پٹ کے اوہنوںبس ویہندا نہ رہیں ایہ نظارہ اے چن بڑے حوصلے دا سانبھ لئیں نہ کہویں ہتھوں لنگھ گیا روواں ہجر فراق دا کیہ رونا ہنجو کیر کے ہڑ لیاوناں کیہ ٹوٹا ٹوٹا ہویا ایہہ دل میرا وانگ ہنجوواں اکھیوں لنگھ گیا ۱۸ اسمانیں عقل اُڈاری نالوں راتیں عشق چ کھاویں مار تے ڈاہڈا چنگا اے افلاطونی علماں نالوں دل وچ درد ہووے جے یار تے ڈاہڈا چنگا اے کل راتیں ملوکڑے جیہے اک ساقی کول بہہ کے پیار دے نال کہیا سرخ شراباں نالوں سینے وچ جے ہنجو لویں اُتار تے ڈاہڈا چنگا اے دارا شاہ دی شاہی دی اے شوہ چ کیہ، فریدون دا مان تران اے کیہ جیہڑا فقر دلاں دیاں تختاں تے کرے شاہی بن تلوار تے ڈاہڈا چنگا اے جدوں آویں کدی ڈیرے عاشقاں دے نال لیاویں پیار وچار اُچے خانقاہ چ صوفی دے نال ماریں یبھلیاں بے شمار تے ڈاہڈا چنگا اے رمکے رمکے وگے دل نہر دے وچ بِنا کسے طوفان دی منت دے جے ہڑ آوے مُڑ اتھرے شوہ دریاواں توں اس نہر وچ اُٹھیا اُپھار تے ڈاہڈا چنگا اے تیرا ہڑھ طوفان گزارنے نوں اس شہر وچوں خورے کتے کوئی جا ای نیں اس گھر اُجاڑ نے شوہدے نوں چھڈ آویں جنگلوں پار تے ڈاہڈا چنگا اے اقبال جہے شاعر نوں تُسی لوکو! کجھ کہہ لوو کافر تے نئیں آکھ سکدے مت مارے سودائی نوں کڈھ چھڈو جے تسی مسیتوں باہر تے ڈاہڈا چنگا اے ۱۹ جان تلی تے دھر نکلن دا حُکم نہ دے مسلمان نوں یا فِر ایس نکھدڑے تن وچ جان نروئی بھردے اِنج کردے یا اُنج کردے باہمناں تائیں آکھ او گھڑ لین رب نواںکوئی اپنا یا مالا جپدے لوکاں سینے اندر، آپ توں دھرنا دے اِنج کردے یا اُنج کردے یا تے آدم ہور بنا جنھوں رکھ ابلیس توں ماڑا یا ابلیس، جو دین عقل ازمائش نوں کجھ دُونا کردے اِنج کردے یا اُنج کردے نواں جہان بنا لے یا فیر ازماون دا ڈھنگ بدل ہُن تک ساڈے نال جو کیتی، کد تک رہواں گے جردے اِنج کردے یا اُنج کردے فقر جے بخشیں! خسرو شاہ دی شان وی نال ای بخشیں عقل دویں، تے فیر اوہدے وچ جبریلی فطرت بھردے اِنج کردے یا اُنج کردے بدلاوے دی سدّھر یا تے میرے سینیوں کڈھ دے یا، ویلے تے اس دھرتی دی خصلت چنگی کردے اِنج کردے یا اُنج کردے ۲۰ اصلا عقل دا، عشق وی ہے نالے ایہا ذوق نظر بیگانی تے نہیں گھاٹا عقل وچاری چ ہے ایہو جرأت ایس اچ رنداں جہی آنی تے نہیں مینوں پتہ، خیال ایہو منزلاں دا میرے اپنے ای من وچوں پھُٹدا اے راہے پے کے ڈھیریاں ڈھا بہنا، ایہہ گل کجھ مرداں نوں بھانی تے نہیں ہر ویلے نواں کوئی پِڑ منگاں اوس اپنے میں سوداولے توں ایتھوں تیک پئی اوہ مینوں آکھ چھڈے کوئی ہور اُجاڑ ویرانی تے نہیں کیویں ات سدائی پُنے وچ وی میں گلویں اپنے دا رکھیا خیال ڈاہڈا آپو باہر ہے کم دیوانیاں دا سبھناں تائیں ایہہ گل پُچانی تے نہیں ۲۱ تڑپ کلپ بھری ایس جندڑی وچ ہین سواد سارے تینوں بھالنے دے سپ وانگوں اوہ راہ ڈنگ ماردی اے تیرے ول مینوں جیہڑی نہ ٹورے سینہ کھول، جبریل امین بھوندا پھرے آل دوالے ہے عاشقاں دے تیری تاہنگ دی اگ دی لاٹ کوئی اوہدے سینے دے وچ کدی آن ڈگے تینوں ویکھنے دی تاہنگ نال کدی میں حجاب تیرا لیر و لیر کیتا کدی ایس نکھتری اکھ نال ای، پردہ کھچ دتا تیرے مکھڑے تے تیری بھال چ انج گواچ گیا پیا اپنے آپ نوں لبھدا ہاں ایہہ دل تے عقل نگاہ سبھّے تیرے کوچے دے وچ نیں گوا چھڈے تیرے باگ اندر میں پونگریا ہاں تبکا اک تریل دا بخش مینوں دل کھِڑے گا کلی دے نال ایتھے گھاٹا پوے نہ کجھ دریا تیرے ۲۲ اس محفلے کارا ای ہور ہویا نہیں گل شراب تے ساقی دی کتھے یار اے اوہ جیہدا جام بھراں اتے پا دیواں سب مے باقی دی جیہڑا مٹھڑا زہر پیا پیوے سونے چاندی دے جام دے وچ میرے خالی پیالے وچوں کسراں کوڑی گھٹ بھرے تریاقی دی تن مٹی دے چنگیاڑیاں نوں کِت ول سٹاں کیہ ساڑدیاں کم غلط کیتا مری جان تئیں تُوں لا کے اگ مشتاقی دی آ مغربیاں شُہدیاں گند پایا کورے علم عرفان دے چشمیاں وچ جگ گھپ ہنیرے دے وس پاون لئی سانجھ ہوئی مشائی اشراقی دی دھرتی دا دل کرلاوندا اے ’’مینوں زہر دتا، مینوں زہر دتا‘‘ پئی پِٹ دی عقل، نہ وس میرے کوئی توڑ دوا تریاقی دی کیہ مُلّاں تے کیہ دریشی پن، سلطانی کیہ، دربانی کیہ سبھے اپنے کم چمکاون لئی گل کرن فریب نفاقی دی بازار جیہڑے وچ جوہری دی اکھ بھیڑی تے گھٹ ویکھدی اے میرے موتیاں دا مُل گھٹ پینا بھانویں لشکے چمک برّاقی دی ۲۳ دُھخے جگر کلیجہ ساقیا گِلّے بالن دی اگ بال تے سہی فیر ویکھ قیامت کیہ آندی ایہہ رپھڑی مٹی ٹال تے سہی اک کنک دے بھورا دانے لئی سُٹ چھڈیا مینوں بھوئیں تے گھُٹ بھر لاں گا میں ہنجووواں دا دل درد تریہہ اُچھال تے سہی دے عشق شراب جواناں نوں جیہڑے لا کے ڈیک ایہہ پی جاون پا رہند کُھوند فیر پیالے وچ کسے دانش مند، پیال تے سہی ایہہ فلسفہ، حکمت تے دونویں سوچاں دا بھار ای بن گئے نیں میرے خضر نوں میرے مگروں لاہ، مرے عشق دی تُوں لج پال تے سہی جے عشق شراب دی تپ چڑھ کے وی عقل خلاص نہ ہوندی اے فیر کم اے شوخ اداواں دا پئی آکھن دل سمھال تے سہی ایہہ دنیا آس بے آسیاں دی ہُن تک اے کھچ دھرو کردی تُوں دے کے گیڑا انبراں نُوں بے خبریاں سیکھ سکھال تے سہی لا لے تے سُرخ گلاب دے پھُل کھڑ سکدے نیں اجے وی پت جھڑ وچ کسے وڈ وڈیری ٹہنی وچ رت ہووے رتی لال تے سہی ۲۴ کھِڑے سینے وچ پھُل لالے دا کوئی انج دی اج شراب پلا مُٹھ مٹی میری تُوں ساقیا دئیں وا بہار دی نال وگا گُھٹ پی کے مدھ فرنگی دی دل گھپ ہنیریاں وچ ڈبا کجھ انج دا کر، پئی اکھ کھولاں تے ہووے سِدّھی تیر نگا ایہہ حال اے پئی وا ورولیاں وچ میں ککھّاں وانگ ای ڈولدا ہاں دل تک، شُبے وچ ڈبا اے توں من وچ پک یقین جگا میرے اندر تاہنگ دیاں لاٹاں نال پئی کالس جمدی جاندی اے پر فیر وی میں ایہہ تاہنگ کراں، مری رات نوں تاریاں نال سجا میں اپنے ہتھ قلم پھڑ کے بس شاہی نقش لکیرے نیں کوئی انج دے چار کُو جی ہُن گھل جو دیون کم نوں بھاگ لگا ۲۵ میں ہر من بھاندی ہوئی مورت دلے چوں کڈھ کڈھا آیا عقل کشکول خالی کر، میں منگتا بن ترا آیا کدی بوہتے سیانے وی بنا دیندے آدمی نوں جھلّا اجیہے سُوہجواناں توں میں گلواں ہاں پھڑا آیا کدی دنیا میرے پِچھّے، کدی میں دنیا پِچھّے ہاں کوئی انج دا جام بھر کے دے، میں آکھاں بئی ہلا، آیا اِتھاں نہ رمز ساقی دی اُتھاں نہ ول مشتاقی دی میں مُلّاں صوفیاں لاگے تے بس بہہ کے رو روا آیا بڑی آس اے ویلا آئے گا، مینوں خاص لوڑن گے ہلی شاہاں دیاں اکھیاں وچ میں اکھیاں پا، لغا آیا ۲۶ بڑا اے بے مہارا دل پئی کلمہ پڑھ کے کافر اے سجدے کعبے نوں کردا اے بُتاں دا نوکر چاکر اے قیامت دے بزارے آپے پھڑ لئی اپنی تکڑی سُو رب فرشتے تکدے رہ گئے ایہہ بندہ اے یا تاجر اے بھوئیں تے نیلی چھت دی اپنے ڈھب تے ورتوں کردا اے ویکھو، راہ دا گھٹا آکھے قدرت نال برابر اے کدی تے رب نوں جی آہندا اے کدی مُنہ وٹ کھلوندا اے کدی یہودی چلتر باز، کدی ایہہ علی حیدر اے بے رنگا وی ہو، شُہدے نیں کِنّے ای رنگ کھلارے نیں ویکھو بھا کلیم اللہ نوں پیغمبر ہو کے ساحر اے اُہدی ڈوہنگی اک نگاہ بندے نوں جھلّا کردی اے بن سدائی جو حدّوں ٹپے اوہنوں مار دا نشتر اے آلکس ماریا اپنے تئیں وی کدی نہیں اپڑ سکدا آذر وی ہزار ورھے تک بن کے رہیا اک بُت گر اے ۲۷ تُوں حشر دیہاڑے شاعر نوں پیا آکھیں ’’مستا‘‘ کیہ چاہویں تُوں آپ بڑا ہنگامہ ایں تے ہور ہنگامہ کیہ چاہویں میری پہلوں رواں طبیعت سی اُتوں سُٹیا وچ سمندر دے کر چاک مرا ہُن سینہ تُوں، منگیں موتی، دریا کیہ چاہویں میں بے حضور نماز کدی پڑھ سکدا نہیں پڑھ سکدا نہیں ایہہ کافر دل لے آیا واں ہُن ہور زیادہ کیہ چاہویں ۲۸ کفر ایمان دی جنگ دا میرے من وچ کوئی رولا نہیں جنت منگے، جندڑی والا، غم ایناں وی ہولا نہیں میرا اندر پھولیں گا تے اوتھے وی توئیوں ہوویں گا چن دا چانن، وچ اُجاڑاں ذرا وی ماسہ تولا نہیں ۲۹ باز شکاری، مٹھڑا بولدی چڑی وچاری، تیری اے جندڑی دی ایہہ راہ اے بھانویں نوری ناری تیری اے جاگدا دل تے مٹھ مٹی دی، نال نظارے دنیا دے سیر سپاٹے، رات نوں چن دی چڑھی سواری تیری اے میریاں ساریاں گلاں تیریاں، دل وچ بھانویں ہونٹھاں تے موتی بحر چوں کڈھ ناں کڈھ، ایہہ وی مختاری تیری اے میں تے اک مٹھ مٹی ہاں کتے پُہنچاں بھانویں نہ پُہنچاں لالے دے پھُل تیرے، بدّل، بادِ بہاری تیری اے نقشنہارا، تُوئیوں ای ایں، اسیں ایویں قلم گھسیٹی دا اج بھلکے دیاں ساریاں لکھتاں، نقش نگاری تیری اے گِلے تے کئی نیں، پر اوہ دل توں کدی زبان تے آندے نہیں مہر بے مہری، عیاری، مکاری، یاری تیری اے ۳۰ کیہ کریں گا پارسائی دا دل ہووے نہ اشنائی دا میرے سینہ بۂو، جھٹ ساہ کڈھ لے لاہ بھارا بوجھ خدائی دا تُوں کتھّوں دا میں کتھّوں دا دس تھاں! کیوں بھیت لُکائی دا ہُن ناز اداواں یاد کریں نہیں بھُل کے دل ازمائی دا مینوں راتی! پُورے چن کہیا لا سینے داغ جُدائی دا دل سڑ سواہ ہو بولیا اے کیوں مذہب عشق جُدائی دا دل لیا رکھیا تیرے پیراں وچ کیہ لئیں گا گنڈھ کھلوائی دا ۳۱ دل جہان چ عشقے دا ہُن دھرنا مارنا ویکھو کٹ وڈھ، ساڑھ سواہ کرنا فر مُڑ اُسارنا ویکھو کیہڑا دل اے جس وچ چانن نہیں ایس رشنائی دا شیشے تک ہزار طرحاں دے روپ نکھارنا ویکھو اِکّو ہتھ، سلمان جہے کئی ملک مٹائے ایہنے فقر دے اگّے دو جہاں دا پل وچ ہارنا ویکھو دانیاں دے دل، دید لئی راتی، رو رو پھاوے ہوون یار، نداناں نوں گل لاوے، فیر پچکارنا ویکھو ۳۲ منگتا، راہ دے کھوبے وچ اے پھسا کھلوتا ہالی تیک قافلہ، منزل تے سامان ای ویہندا پھردا ہالی تیک کتھے وے اوہ برق تجلّی جیہڑی گھر نوں پھُوک دوے کھیتی نوں کھلیان کرن لئی پِنج کے رکھیا ہالی تیک میری بیڑی طوفاناں وچ ٹھِلّن دا کوئی چارا کر چھلّاں توں ڈر کنڈھے تکنوں میں نہیں ٹلیا ہالی تیک منزل اُتے پہنچ، سفر دا کیف، سواد وی جاندا اے بھاگاں والاں، جیہڑا یار دی راہ وچ ہے آ، ہالی تیک جیہڑا دونویں جگ ورتوں وچ وکھرا رنگ وکھاوے نہ جھوٹھے نقش لکیری بیٹھا آپ اوہ کملا ہالی تیک جلوے دی اک جھلک، تے میرے شوق دا نہ سامان کرے کسراں کڈّھاں جیہڑا دل وچ کنڈھا چبھیا ہالی تیک لاگے بہہ کے پیار کہانی ہور وی لمّی ہوندی اے کنیاں کہیاں ان کہیاں نیں ہے کالجہ ساڑیا ہالی تیک ۳۴ تھاں ٹکانے دیاں نہیں لگیاں تاہنگاں مینوں راہ وچ بیٹھاں، پردیس لگے ہر تھاں مینوں فجرے ڈھیر سواہ کہیا پُروائی نوں پہلوں ای وا تھل دی کر گئی ٹھنڈیاں مینوں سہجے لنگھ نہ انج کھلارا پا میرا قافلے دی ہے یاد کہیا دُھخناں مینوں اکھیاں وچوں ہنجو وانگ تریل گِرن میں ہاں خاکی راہ اچ اے رہنا پیناں مینوں میرے دل دی واج نوں دسیا کنّاں نیں ساری کھیڈ حیاتی دا سر چشماں مینوں ازل تے لشکاں پشکاں میرے کل دیاں نیں ابد نیں چا اُڈیکاں نیں لائیاں مینوں غم نہ کر میری مٹی دھوڑ نہیں بن سکدی تیری جان دی سونہہ، کُجھ نہیں ہوناں مینوں ۳۵ ساقی دے نیناں چوں مینوں مستی چڑھی شراب جی بِن مے توں حال خراب جی، بِن مے توں حال خراب جی بے حجابی پاروں ہویا میرا شوق ودھیرا اے ویکھاں بھانویں نہ ویکھاں جی کھائے وہلیٹے صاحب جی دیوے دی بتی دے وانگوں جھٹ پھڑ لیندا اے اگ نوں من باجے دے تاراں اُتے وجدی جدوں مضراب جی میرے وسّوں باہر کدی نہیں میری منزل ہو سکدی جے کہ راہ نہ اوڑے تے فیر میرے لیکھ حساب جی چڑھدے ولّوں جد تک سورج پورا چڑھ کے آوے نہ تاریاں ونگراں ٹہکدے رہسن میرے سُفنے، خاب جی ۳۶ میری رات نوں اوس سویر کیتا جیہدا مُکھڑا آفتابی اے سوہنا مُکھڑا اوہ آفتابی اے جیہنوں جچدی بے حجابی اے توہیوں میرے درد نوں جانیا ایں میرے دل وچ جھٹ آرام کر کے ہُن اکھیوں اوہلے لکیں پیا، تک ایہدے اچ بڑی خرابی اے بے مُلّیاں دا اتباروی توں بے چینیاں تئیں ہیں قرار وی توں جیہڑے دل پھٹ کھائی پھردے نیں تیرے ہتھ اوہناں دی چابی اے غم عشق دا، فیر سواد اوہدا، دُوناں اثر اے دونواں لذتاں دا کدے سوز تڑپ تے درد مندی، کدی مستی نال خرابی اے میرے دل دا حال سُنا آپے، توہیوں جانناں ایں وچلی گل کیہ اے میں وکھیوں ٹولیا، بولدا نہیں، کر گیا اوہ بے حسابی اے سونہہ تیرے جلال دی دل اندر کوئی آس نراس میں رکھدا نہیں بس اینی دُعا اے ہُن مولا، بخش کاہی نوں اکھ عقابی اے ۳۷ میرے ساقیا ایس مے خانے وچ میرا محرم نہیں کوئی ہور خورے میں ای پہلا بندہ ہاں جیہدے جگ توں نیں وکھرے طور جھٹ گھڑی لئی ایس سریر نوں توں مٹی دی مُٹھ بنا دیویں فیر لا ترونکا پانی دا کریں اگ بھڑکدی ہور لیا کوئی نصیبا جاگدا اتے جام جہان وکھالدا کیوں ہور کسے جمشید ولّے دتا اے عجم نوں ٹور ۳۸ اس درد منداں دی دنیا وچ دس کیہ اے بھلا کم کار ترا دُکھ سُکھ دی نہ پروا تینوں جی رہوے نہ بے قرار ترا کیہ ہنجواں بارے جاننا ایں اکھیاں چوں ٹپ ٹپ کیوں کِردے دھر اَوس دے موتی پھُلّاں تے، تاں چمکے کاروبار ترا اس جان دے بارے کیہ آکھاں پئی ساہ وی گن گن لیندی اے نہ کھیچل تینوں روٹی دی نہ دم اے کوئی اُدھار ترا ۳۹ اک دید نظارا ملن تے جے میں، میں نہ رہواں فر اوہلا ٹھیک سِک دید بڑی اے پر سائیاں، مُل بوہت ودھا کے نہیں منگنا ٹھیک آ ساہمنے بہہ کے گل کر لے کیوں لُک لُکا کوئی رکھنا ایں دن لنگھ گئے، جد کدی آہندے ساں پئی انج نہیں، انج نہیں کرنا ٹھیک بے ادبی ساڈی معاف کریں تینوں چدّر اوہلے وی ویکھ لیا کجھ اپنے آپ نوں رکھن لئی، جگ ہور بنا، اک نہیں رہنا ٹھیک ساتھوں لانبھے ہو ہو رہنا ایں کریں نخرہ بے نیازی دا نالے آکھیں دین گواہی لئی ہے یاراں دا رت ڈوہلنا ٹھیک دئیں بندگی نوں کجھ ہور جگہ دویں عاشقاں تائیں ہور مقام کم نوریاں تائیں بس سجدے اَتے خاکیاں جان لُٹانا ٹھیک ایہہ دل جو کچا تانبا اے لواں پیار دے نال میں کر سونا داں پہنچ کے جد حضور ترے تاں آکھ دویں ہے تحفہ ٹھیک ۴۰ نور ترے نیں ظاہر کیتا جو کجھ وی اے چٹا، کالا دریا، پہاڑ تے جنگل بیلے، سورج تے چن، تارا اکھیاں اوہنوں لبھن ٹُریاں جیہڑا قدر پچھانے من شُہدا اوہدی بھال چ ہے جہنوں سہہ نہ پائے نِگا ۴۱ اپنی موج تے مستی وچ ای ڈُبیا دل دے ساہنوں لانبھے کر اوہ دل جیہڑا پئی کہوے بگانے ساہنوں دل وی اوہ دل جہدیاں دُھمّاں چار چوفیرے ہوون کھوہ پرانہہ سُٹ دل جیہڑا دیء گھاٹے وادھے ساہنوں کھچ تقدیر کمان شکاریا کردے وسّوں باہر تیر کمانے رہ نہ دسّے سینہ چیر کے ساہنوں جند حیاتی جگ بھاء دے کم کردے نہیں اے تھکدی اک جہان چوں کڈھ کے، لے جائے دُوئے جہانے ساہنوں ۴۲ مُٹھ مٹی دی پونجی میری راہ وچ دھوڑ اڈاواں آس بڑی اے اک دن ایہنوں انبراں تیک پُچاواں کیہ کراں کیہ چارا لاواں گیان دھیان دی ٹہنی تے اک کنڈا نہیں انج دا جس نال دل وچ چوبھاں لاواں ہجر فراق دی اگ پئی میرے تن نوں پھُوکے ساڑے اوسے دم میں مر مُک جاواں جیکر اگ بُجھاواں عشق شراب دی مستی میری رت وچوں نہ نکلی میں تے دل ایسراں نہیں دتا جے مُڑ کے پرتاواں میرے من دی تختی تے، تُوں اپنے دل دیاں لخیاں سِدھ پڑھن دی سِک وی دے دے پُٹھا نہ پڑھ جاواں تیرے در حضوری آ کوئی میری غزل سناوے آکھ دویں ’’میں جانناں ایہنوں‘‘ تاںجے عزت پاواں ۴۳ جیہڑا دل توں بخشیا مینوں ایس یقین دے نال بھرے ہاڑا ایس جام وچ پیا جہان دِسدا ایہہ ودھ ہور وی چمکے ہاڑا میرے پیالے وچ اسماناں توں ڈگدے ہین کڑتّن دے تبکے اتے رند دے مونہہ وچ پیندیاں ای بن جاندے شکر پارے ہاڑا ۴۴ عشق ترے دی رمز جے ہووے لوبھیاں دے وچ کہہ نہیں سکدا لاٹ دی لشکاں پشکاں دی گل ککھاں دے وچ کہہ نہیں سکدا گل کرن دا ذوق تُوں مینوں دے کے آکھیں ہُن گل کر پر میں اپنے من دے گل تے لوکاں دے وچ کہہ نہیں سکدا دل دے ڈوہنگ ہنیریاں وچوں سوہنی غزل جو نکلے ٹہنی اُتے بیٹھ سناواں، سنگلاں دے وچ کہہ نہیں سکدا جے نہ شوق دوامی ہووے گل لباں تے نہیں جچدی کیوںجے گل تیری اے سائیاں! گھڑیاں دے وچ کہہ نہیں سکدا ۴۵ کیہ دن سن چنگ، نَے سُندے ساں رج پین دا دور شباب دا سی اوہدے ہتھ وچ بھری صراحی سی میرے ہتھ وچ جام شراب دا سی چن ماہی مُکھ وکھاندا تے پت جھڑ وی عین بہار ہوندی رت رنگا رنگ بہاراں دا اوہدے اوہلے وچ عذاب دا سی تُدھ باہجھ تے اس جند ساز دیاں سبھ تاراں ٹوٹے ٹوٹے نہیں تینوں لاگے بھا کے مستی وچ سُر چھیڑ دا تار رباب دا سی ترے شوق دی محفلے آن ویلے مرے کول سی جو، تُوں جاننا سیں اک جنگل ہو کے ہاواں دا، ہتھ جام تے پھُل گلاب دا سی اک وار توں فِر ہُن پیدا کر اوہ جذبہ پیار دی طاقت وچ جس بِرتے پھوہڑی دان کہیا اوہدا بوریا تخت نواب دا سی مرے یار نیں سبھ خوش اس گل تے میں منزل اُتے اپڑیا ہاں میرے دل نوں پیندے ہول میاں میری سُوجھ دا انت حساب دا سی ۴۶ ایہناں ہنجو بھریاں اکھیاں نے میری جھولی تارے بھر دتے اس دید کرن دے شوق ہتھوں جیہڑے انبروں باہر نیں سٹ چھڈے بھانویں لکھ دھرتی دی کُھرچن ہاں پر تاریاں کولوں اُچے ہاں توں جانیں ساہنوں پھبدے نہیں ایہہ طور چننگ جہی جندڑی دے ایہہ شام سویرا دنیا تے ہے ساڈی گھمن گھیری نال توں جانیں نہیں تاں راس کدوں نیں ساہنوں ایہہ شاماں تڑکے اساں اسمان صراحی چوں تیری ساری مدھ مُکا دتی نہ کر ہُن کنجوسی ساقی اک بھری صراحی فِر دھر دے کھلوارے دونہاں جہاناں دے نہیں پجدے مرے جنون تائیں ایہہ وی بس راہ چ آوندی اے اوہ وی ہے وچ ساڈے رستے ۴۷ مشرق نویں خیالاں دے، اسمانیں لائے پھندے بے پروائے لوکاں دے ہُن تاہنگوں سینے ٹھنڈے ڈھیر سواہ چ بھڑک نہ کوئی جندڑی والی لبھے موجاں نوں ہُن دوروں تکے پیا کھلو کے کنڈھے بُت خانے یا کعبے دے وچ ہِڑک بِڑک نہ کوئی ہُن تے پیر مغاں دی مدھرا بے سوادی ہوئی سوچ فرنگی دنیا نوں ایں کیتے لمبے سجدے اکھاں والے انھّے رنگ رنگینیاں وچ نیں کُھبّے ایہہ چکری، اسماناں توں ودھ، تے موتوں ودھ لٹیرے ایہدے ہتھوں پھٹے جو لیڑے فیر گئے نہ سیتے مٹی جائی، نیں عادت اسماناں والی پھڑ لئی کرے چلتر، ہیرا پھیری، ول چھل تے گنجھلیٹے مشرق ول خراب جے ہویا مغرب اوہتوں اگانہہ ماری گئی ایہہ دنیا کھوج دے ذوق، جدوں دے چھڈے ساقی لیا شراب تے محفل رات دی آن سجا محرماں والی تکنی دے نال حال تباہ کر جا ۴۸ تڑفن آہرے اس دل نوں تُوں ڈولن لئی نہ ویہلاں دے اک دو کُنڈل ہور ودھا لے لشکن والیاں زُلفاں دے تیرے پاروں سینے میرے چمکی برف تجلّی دی چن سورج نوں میں تے ایویں رکھیا وچ اُڈیکاں دے ذوق حضوری پاروں جگ وچ بُت گری دی ریت ٹُری عشقوں دھوکھا کھاون جیہڑے رہندے نیں وچ آساں دے تاں جے کُھل کُھلا کے کدھرے میں گاواں کوئی گیت نواں میں باگاں دا پنچھی مینوں مُڑ توں گھل وچ باگاں دے طبع اُچیری دتی اے تے پیراں چوں وی بیڑیاں کھول تاں جے تیری گدڑی توں میں واراں جوڑے شاہاں دے شیشے نال جو پتھر بھنیا تاں اس گل دی کج تھوہ پئی عشق کندھیڑے لدی پھردا بھارے بھار پہاڑاں دے ۴۹ ایس زمانے نال تے ایویں کھہندی رہندی جندڑی جویں پہاڑا وچ کرلاٹاں پاندی پھردی کوئی ندی ساہمنے ہو کے متھے لائے لُک چھُپ کے وی لڑدی رہے ڈھے جانی دا جوڑ اُنھاں نال جنھاں دی پکی ہستی ایہہ پہاڑ تے ایہہ تھلوادے ایہہ بیلے تے ایہہ دریا نہ ایتھے کوئی محرم ہا تے نہ ایتھے کوئی دردی شوق توں ایہہ بیگانے سارے شوق توں وی بیگانے ایہہ بھانویں نیں جھرنے یا فر وگدی ہوئی کوئی ندی اثروں خالی حال دُہائی اصلوں خالی حال دُہائی ٹہنیاں اُتے انج تے بُلبُل پھرے ککارے بھردی اوہ اک داغ کہ جیہڑا میرے سینے اندر دُھخدا اے لالہ زاراں وچ اوہدے جیہا ہور نہ دُھخدا اے کوئی نہ تے محفل وچ اے ایتھے نہ ہے اوہ ساقی دے کول اک کوڑی گُھٹ جیہڑی رنداں نوں اے دیندی چس بڑی ۵۰ تیری بھائی تسلّی نے جد اپنا کم نہیں کیتا تڑفن آہرا دل اساں کر ترے حوالے چھڈیا اوہ کیہ دل اے، کھیچل کردے، ہردم ساہ گننے دی اپنے ویلے دی نہ باگ نوں اپنے ہتھ وچ پھڑیا تیرے وچ ضمیر میں سُتّا اپنا آپ وکھاون لئی توں لشکارے ماردا موتی کنڈھیوں باہر اے سٹیا چن تاریاں نوں ڈھیر گلہ اے، جاندا ہوسیں تُوں وی مٹی وچ وی لاٹاں ماردا دیوا کیوں دھر چھڈیا ایناں ای بہت اے، تیر اپنے دی سینے چوبھ لگائی پیریں پیا شکار بھانویں نہ اوہنے اپنا چکیا ۵۱ تاہنگ جہان دی گل تے خورے اِکّو حرف مُکا دیندا پر میں ذوق حضوری پاروں گل نوں ہاں لمکا دیندا عاشقاں کولوں بولن دی تُوں ہمت کھوہ لئی جاندا نہیں پیار تے گونگیاں نظراں نوں گل بات دا ول سکھا دیندا کتھے نوری، قاصدی بن کسے شے دا جانو ہوندا نہیں کتھے خاکی جو اپنی ہِک وچ نیلی چھت نوں جا دیندا تُوں میرے وجود دی ہوند اچ جے کجھ ماسہ تولا کردا میں نہ لیندا مُل بھانویں توں ہمیش حیاتی پا دیندا بے انتے شوہ دریاوا! تیریاں چھلّاں نال میں گھول کراں کوئی لوڑ نہیں کنڈھے لگن دی نہ موتی لوبھ لبھا دیندا میرے اندروں پھُٹ تریل طرحاں ہُن برسے معنی نویں نویں میرے روونے تے کرلاونے نوں وی دنیا نویں بنا دیندا ۵۲ کد تک شام سویر دا اوہلا رکھن دے ہین ارادے مُکدی گل مکا ایویں پئی گھنڈ لاہ تے پورا جلوہ دے ایہہ سوز گداز دے حال دی چس جے تینوں میں دس دیواں توں آپ کہویں کہ اوہ مستا! ذرا مینوں وی ایہ مدھرا دے میرے راگ حیاتی نال ای ہویا اے اگ دا لمبو تیز لا اک تریل ترونکا تُوں وی پھُل وی تیہہ بُجھا دے عقل پھرولدی ورقے رہ گئی عشق ایہہ نکتہ دسیا پنچھی اوہ سیانا جیہڑا دانہ چُگے وچ پھاء دے کتھے میں تے گیت دی گل ایہہ شعر تے ہین بہانہ گل یوں ایں کوئی بے مہارے اونٹ قطارے لا دے کُھل کے گل کرن ویلے وی میں ورتے رمز کنائے توں دس کدھر جاواں جے کوئی ساتھ نہ توڑو توڑدا دے ۵۳ ویلے دی گُنجھل وچ پھسیاں، ساہ گِن گِن ڈنگ ٹپائی دا اتے وانگ سمندری چھلّاں دے پیر کنڈھیوں باہر نہیں پائی دا دریا دیاں مارو چھلّاں توں ایہہ ٹھیک اے کوئی وی بچ دا نہیں اسیں سپیاں وانگ بچن دے لئی اکلاپا اے گل لائی دا میرے اندر وسدے جوہر دی کیہ جوہریاں کولوں پُچھدے او اسیں اپنی آپ کسوٹی ہاں کر کھرا تے کھوٹ وکھائی دا کس ساتھوں ٹھوہر اجاڑاں دا منگناں ایں آ کے باج بھلا اسیں مل کے راہ فقیری دی شاہ بن گئے ایس خُدائی دا ہے دوجا کون ایں سینے وچ مینوں آپ بڑی حیرانی ایں خورے توں ہیںیا فِر آپ اسیں، ہے ’’میں‘‘ نال متھا لائی دا ہُن مٹی دے اس مادھو دی تقدیر توں مولا پردہ چُک اسیں اپنیاں آپ اُڈیکاں وچ، بہہ تیری راہ وچ جائی دا ۵۴ لب کھولے نہیں فریاد کنوں فریاد دے وچ اثر ناہیں دُکھ دل دا آکھنا چنگا نہیں کسے وچ سُنن دا جگر ناہیں بھانویں حرم تے بھانویں دَیر ہووے گل ہر تھاں ہے اشنائی دی ایتھے تیرے میرے رازاں دی پر کسے نوں کوئی خبر ناہیں کیہ تکیے ایہہ کوئی تھاں تے نہیں چنگیاڑا بلیندا جو جگ وچ اک پل جے اُس تے نظر پوے، دوجے پل وچ اوہ اُدھر ناہیں تُوں لنگھ کے ساڈیاں اکھیاں چوں جا دل وچ ڈیرے لائے نیں انج لنگھیا ایں پر ایتھوں دی نِگہ نوں ہوئی خبر ناہیں دل جیہا نگینہ تیری عطا پر کسے وی قدر پچھانی نہ اسیں موڑیا تینوں تاں کر کے ایہنوں تکدی کوئی نظر ناہیں بھر بھر کے پیالے دیندا اے افرنگی ساہنوں جس مت دے اوہ بھانویں پورا سورج اے، پر تڑکے دا اثر ناہیں ۵۵ چن ورگے بن کے ایتھوں تیک اسیں ڈگدے ڈھیندے آئے ہاں کوئی جاندا نہیں ہے، پر کسراں، اتے کیہڑے رستے آئے ہاں دل درد اساڈا کھول کہیا تُسی ایویں نال رقیباں دے ہوکے ہاواں دا ایہہ اثر ہویا پئی شرم چ ڈُبے آئے ہاں گھُنڈ مکھڑے توں ہُن پرانہہ کرو تسی نویں سویر دے سورج او تہاڈی دید کرن لئی اکھیاں دے ایہہ پیالے بھر کے آئے ہاں ساڈا عزم یقین تے پکا اے توں ویکھ اسانوں اکھ بھر کے اسیں اج وی ایس لڑائی وچ بِن فوجی دستے آئے ہاں راہ جاندیاں ایہہ نگاہواں نیں کیہ کم پایا تُوں جاندا نہیں بس تیرے کولوں دعاواں منگدے، توبہ کردے آئے ہاں ۵۶ چن سورج دیا مالکا مٹی بھورا بھورا ویکھ ذرے اپنے وچ وسایا کویں اجاڑا ویکھ بے انتے اس حسن نیں سینے دی خالی تھاں مل لئی اپنے سورج نوں میرے گلویں وچ لُکیا ویکھ آدم زادے دل تے عشق بلاواں بولیا ہلّہ آپوں لائی اگ نوں ہُن توں تھاں تھاں بلدا ویکھ دھوئے حیاتی دے پلّے توں لگّے داغ پرانے میلے پلّے والے نوں ایہہ کھیچل کردا ویکھ ساڈی دھوڑ بناندی پئی اے ہور نواں اسمان اک بھورا کُو شے توں بن دا توں ایہ بیلہ ویکھ زبور عجم حصّہ دوم سدرہ رُکھ دیے لگرے باگ چ کنڈیاں ککھاں جہی نہ ہو جے اوہدی انکاری ایں توں اپنی تے انکاری نہ ہو چار شعر دو عالم اس وچ دِسدے ہن جو ہے صراحی میرے کول اوہ اکھ کدھرے جو ویکھ لوے شے ویکھن والی میرے کول کوئی دُوجا ہور نہ شہر دے وچ آوے گا رولا پاوے گا کِتے ودھ ہنگامہ چک دے گی جیہڑی ہے جَھلوائی میرے کول اوئے جھلیا غم نہ کھا کوئی تُوں رات ہنیری آنے دا کیوں جے تارے ہار چمکدا اے اک داغ پیشانی میرے کول مینوں یار بنانا چاہنا ایں؟ پر مینوں اک ڈر لگدا اے نہ جھل سکیں گا جیہڑا اے اک شور طوفانی میرے کول ۱ کر ہوش پئی ابنِ آدم دے اُٹھن دا ویلا آیا اے مٹھ مٹی اگے تاریاں دے ہُن جھکن دا ویلا آیا اے جو بھیت لُکا کے رکھیا سی ہستی نیں اپنے من اندر پانی خاک دی شوخی نال دسّن دا ویلا آیا اے ۲ شوق سفر وچ چن تارے جو ساڈے نال دے پاندھی نیں بڑے سیانے، دانا بینا، جاندے گل اگانہہ دی نیں مٹھ بھر مٹی دے جلوے کیہ اوہناں خورے ویکھ لئے کر کے کنڈ اسماناں ولے تکدے ریجھ رجھاندی نیں ۳ لنگھ کے لالے دے پھُلاں چوں وانگ صبا دے جا سکنا ایں اکّو پھُوکے گنڈھ کلی دی کھول کے پھُل بنا سکنا ایں جندڑی کیہ اے؟ سارے جگ نوں اپنے وس وچ کر لیناں توہیوں ای جگ دے وس وچ ہیں ویں، جگ نوں کسراں پھاء سکنا ایں تیرے لیکھ سن، چن سورج نیں تینوں متھا ٹیکیا سی تُوں اِیں رمز ہلی نہیں پائی کسراں انکھ وکھا سکنا ایں میرے من مے خانے وچوں جے کدھرے تُوں اک پیالہ پی لیں آس اے مُٹھ بھر مٹی نال ای نواں جہان بنا سکنا ایں تُوں ایہہ کسراں اپنے سینے دیوا بالیا اے قبالؔ اپنا داء جے لا سکنا ایں، ساڈا وی داء لوا سکنا ایں ۴ جے چاہنا ایں عشق سمندر دا توں کنڈھا پائیں پلّیوں کڈھ، ہزار کُو لاٹاں، فیر چنگیاڑا پائیں مینوں اوہنے اُڈن اُڈاری دا سواد اے پایا تُوں چاہنا ایں باگے دے وچ جا کے آہلنا پائیں پُگّیاں لوکاں دے لاگے یا لڑ لگ کے تے ویکھ چاہناں ایں جے اپنی اکھ وچ من دا چاننا پائیں بوہجے پا جنون توں ٹُریا شہر چ ڈونڈی پِٹّن بھن پیالہ بہہ اُڈیکیں رات نوں بھریا پائیں ساڈی من پشوری لئی من کھِچ اداواں سکھ جے تُوں چاہنا ایں ساڈے کولوں غزلاں عشقیہ پائیں ۵ ویلا تے اوس سوہنے دا اک اُڈن بلارا بنیا اے اُڈن بلارا وی انج دا پئی کُل وجود سنیہا اے ایہہ نہ سوچیں لیکھ ترے وچ یار دا جلوہ لکھیا نہیں اینی گل اے، تیرے سینے تاہنگ دا جذبہ کچا اے من دے آں، پئی تیری اُڈاری شِکرے نالوں اُچی اے ہوش کریں پئی اساں وی اگیوں، مہا شکاری چھڈیا اے اوہناں دی تے دھوڑ تئیں وی کدے جبریل نہ اپڑے گا اوس اُچے دربار دے پاروں اوہدا ناں اُچیرا اے ساہواں دی پیا گنتی کر کر جیونا ایں پر جاندا نہیں گھمن گھیر دناں دا جادو توڑ کے جیونا، جیونا اے مغرب دے میں علم تے دانش بارے ایناں آکھاں گا چنگا اے، پر رون سیاپا کہڑا اکھیں تکیا اے مینوں چن صلیب دے جھیڑے بارے کوئی فکر نہیں اج کل تے اک ہور ای فتنہ دونواں دے مونہہ آیا اے ۶ اپنے یار دے بھولپنے دی گل تہانوں کیہ دسّاں بیٹھ سرہانے، پُچھدے میتھوں، ہور کہنوں، کیہ دسّاں بھانویں ہے دلیر زبان تے من مراد وی مٹھڑی اے عشقے دی گل کر نہیں سکدا اُروں پَروں کیہ دسّاں بھاگاں والا آپ سریر چ لہہ گیا توڑو توڑی موتی وانگ نتھار سوکھالی گل مونہوں کیہ دسّاں وصل سواد جو لیندیاں تکیا مینوں گیا پچھان بُڑ بُڑ کردا آکھ گیا جو، ہُن مگروں کیہ دسّاں غم نہ کر، جے دنیا اپنے اندر دی، نہیں دس دی پھُل کدوں نیں دسدے، بُلبُلاں روندیاں کیوں؟ کیہ دسّاں میں تے اپنا شوق سنیہا کیہ چھڈیا کُھل ڈُلھ کے جویں تریل وڈی پھُل وچ آہندی، ہُن اندروں کیہ دسّاں جے میں ساریاں وکھرو وکھری دسیّاں تے کیہ مہنا ہر کوئی وکھری آکھ گیا جو، زُلف ولّوں، کیہ دسّاں ۷ عقل تے سیراں کردی پھردی ذوق نظر دے کاروں ہر موجود تے ناموجود نوں لبھ لیندی اے سِریوں چن سورج نوں چھڈ پرانہہ کر جلوہ منگ توں اُسدا اس بُت خانے وچ ہر جلوہ میلا تھیا نگاہوں ۸ میں غلام اوہناں جی داراں دا جیہڑے عاشق ہوئے سچے اوہناں دا نہیں تکیے تے مل بہندے پر جو نہیں دل کسے نوں دیندے دل جیہڑے ہر رنگ دے جانو ہو کے بے رنگ رہندے بُت خانے، مے کدے، مسیتاں اوہیو ای رونق لاندے چن تاریاں توں ڈھیر اگانہہ اوہ رکھدے ہین نگاہ تاریاں دے جھُم گلویں وچ اوہ آہلنا نہیں بناندے محفل دے وچ بہہ کے وی اوہ دِسدے محفلوں باہر اپنے آپ چ رہندے کلّے سبھناں نال دسیندے اِہناں سچے عاشقاں نوں نہ بھیڑا جان کے تک ایہہ نمانے اصلی پونجی ہین اس قافلے پلّے لیکھا لیکھ آزادی دا لکھ دتا بندیاں تائیں شیخ تے باہمن انج پئے دسدے چاک توں اُجڑ کھُسے پھڑو پیالہ کہندے نیں پئی ایہہ ہے مے حلال بھانویں حدیث اے کچی پر نیں راوی ثقہ تے پکے ۹ ایس چمن وچ پھُلّاں اُتے ڈُلھّا رنگ اے ہالی تیک ویکھیں توں ہتھیار نہ سُٹیں جاری جنگ اے ہالی تیک مغرب دے تہذیبی فتنے سینکڑاں ہور لُکائے نیں وچ افرنگ دے بال پئی جمدی ایہدی منگ اے ہالی تیک اٹھ کھلو ہن، کنڈھے اُتے بیٹھا ایں آرام دے نال مگر مچھاں دا دریا ڈُمھ چ اوہ رنگ ڈھنگ اے ہالی تیک گینتی لانبھے رکھن دا نہ سوچیں گھاٹا کھاویں گا لعلاں بھریا پتھر دل اک تیرے سنگ اے ہالی تیک ٹھہر ذرا میں ساز وچوں کوئی ہور نواں سُر لبھناواں خورے کنے راگ لُکائی بیٹھا چنگ اے ہالی تیک جدوں جنون نوں میرے تکیا جگ دے نقشنہارے نیں آکھیا تیرے جھل پنے لئی ایہہ جگ تنگ اے ہالی تیک ۱۰ کدی دلیل یا مٹھڑے بول تے تکیا کیتا جاندا اے حق لئی پر تلوار تے نیزہ اُچا کیتا جاندا اے گدڑی تھلّے کدی کدی تے زرہ وی پانی پیندی اے عاشقاں لئی تے ہور وی اس توں وادھا کیتا جاندا اے جدوں جہان پرانا لگے ساڑ سواہ کر مٹی پائو نویں جہان لئی اس مِٹی نوں گارا کیتا جاندا اے میری قوم تے پیار دی جھات دے بدلے دیندی جان لُٹا تاں ای گھاٹے وچ رکھ کے ایہدا سودا کیتا جاندا اے وا دا بُلا ککھاں نال جو کردا اے فیر کیہ ہویا جے کر رُوہاں نال وی ایہو کارا کیتا جاندا اے عشق، حیاتی دے بزارے وکدی ہوئی اے جنس کوئی کدی تے سستا وکدا اے کدی مہنگا کیتا جاندا اے میں تے حال دہائی پائی تاں خورے توں جاگ پویں ہاہا کار بِنا وی کم تے عشق دا کیتا جاندا اے ۱۱ انکھ انا دے مست پنے وچ ہڑ دا روپ وٹا لے یار لانبھے رہن دی مت نہ لے، وچ پِڑ دے بھنگڑا پا لے یار باگھ پھڑن دی سوچنا ایں تے باگ چ کیہ پیا کرناں ایں جا کدھرے وچ تُوں روہاں دے یا جنگل بیلے گاہ لے یار چن سورج تے پھاہی سَٹ کے دونواں نوں گچی توں نپ انبراں کولوں تارے کھوہ کے گلویں ہار بنا لے یار من لتا پئی انکھ انا دی مدھرا بوہت ای کوڑی اے اپنی جان دے روگاں دا ایہہ دارو جان بنا لے یار ۱۲ مُڑ فِر تھل حجازی وچوں ویلے دا ہادی آیا اے دور دراڈیوں قافلہ ٹُر کے اج اس وادی آیا اے میں غلاماں دے متھے تے رعب شہانہ ویکھدا ہاں چولا خاک ایاز دا پا محمود زُہّادی آیا اے کعبے جئے بُت خانے دے وچ روندیاں عُمراں لنگھیاں نیں تاں جا کے، اس عشق سبھا وچ یار سوادی آیا اے کائنات دی سوچ پرت تے نویاں لیکاں کھچ دا اے درد منداں دے سینے دی کرلاٹ دا عادی آیا اے چنگ پھڑ و مرے ہتھوں ہُن تے گل اے وسّوں باہر ہوئی ساز رگاں چوں رَت اِچ ڈُبّا گیت مرادی آیا اے ۱۳ شاہاں دے اس شاہ دی جھات دی آس رکھاں میں مُسلم ہاں، کوئی بُت نہ پاس رکھاں میرے سینے وچ اے بے نیازا دل منگتے نوں دے، بادشہاں دے خواص رکھاں انبروں جو کجھ ورھدے من دے پھُلّاں تے میں تے گھاہ دے پتیاں وچ اوہ باس رکھاں جویں ثریّا چن سورج دا منگتا نہیں میں وی حق دا چانن من نوں خاص رکھاں بھُل کے وی جے سورج میرا آہر کرے اوہدیاں کِرناں نُوں میں آس نراس رکھاں مینوں ربّوں جیہڑا چانن ملیا اے اوہدیاں لاٹاں نال میں جگ نُوں راس رکھاں جاندا ہاں میں کارے سارے شاہاں دے تدے ای بنا میں یوسف، تپڑی واس رکھاں ۱۴ مست قلندر بن دما دم کریا کر بادشہاں نال بھِڑ جا ’’میں‘‘ نوں پکّا کر مینوں پُچھیا تینوں ہے جگ راس کہ نہیں آکھیا نہیں، تاں کہندے ایہدا پٹرا کر مے خانے وچ تکیا کوئی وی چج دا نہیں رستم یار بنا، کُسنگیوں اوہلا کر لالۂ صحرائی پھُل! نہ کلّیاں سڑ میری اگ نوں، داغ جگر دا اپنا کر جگ دا سوز وی توں تے رت دی گرمی وی نہیں من دا، تے جُثہ چیر کے تکیا کر عقل چراغ نوں بال کے رکھ سبھ راہواں وچ عشق پیالہ پیندیاں سجّن لبھیا کر رت رنگا دل ٹوٹے ہو کِرے اکھیاں چوں مُندری وچ جڑوا لئیں، لعل اکٹھا کر ۱۵ ہُن تک ہَوس تماشے کیتے سارے دنیا داری دے کِنّے ہور نیں فتنے، اوہلے اس نیلی پھلکاری دے؟ عقل دی کچی تانی، تن دیاں سار ای، ٹُٹ دی رہندی اے عشق تے پک یقین طرحاں ایں، عقل تے وہم اُساری دے موہری بنیا ایں تے راہ دیاں اوکڑاں اپنی ہِک تے جَھل حیدری جے اکھواناں ای تے کم وی کر جرارّی دے اکھیاں میٹ کے آکھدا ایں پئی جگ تے سارا سفنہ ایں اکھیاں کھول، پئی انج دے سفنے جاگدی اکھ اتاری دے کلّیاں بیٹھ جمانا محفل عشق دی مُڈھ توں فطرت اے اِکو ذات پچھان، کہ بوہتے قابل نہیں دلداری دے اکو وار چ کَپ کے اوہنوں پلّے دے وچ بنّھ لِتا ہرنی دے دھن بھاگ کہ لگّے ماہر ہتھ شکاری دے باگ بگیلے پیا کھنڈاواں موتی اپنے گیتاں دے مہنگی جنس وی سستی کرتی، مندے ویکھ بپاری دے ۱۶ قابو وچ نہ رہن فرشتے جادوگر افلاک دے پھَسے کھلوتے ویکھ تماشے مٹھی بھر اس خاک دے ایہہ نہ سوچ پئی عشق کرن دا ایہو اک طریقہ اے پھُلّاں دے نیں، پاٹیاں لِیڑیاں وچوں، موسم جھاک دے شوق دی گل تے کلّیاں بہہ کے وی تے کیتی جا سکدی اے اکھراں دی کیہ لوڑ جے مطلب صاف نیں نیّت پاک دے تاریاں نُوں نپ پُتلی توں فِر ویکھ تماشا کِرناں دا پھڑن گیانی شِکرا، تے پر کٹ دے نہیں چالاک دے اکو جھلک وکھال کے آکھیا توں تے ویکھ ای سکدا نہیں ہُن ویکھن نوں ترس گیا اے آپ اوہ جلوے خاک دے ایس بغیچے راگ سُراں تے چھیڑ کے کیہڑا بیٹھا اے کلیاں نمو جھانیاں ہوئیاں، پھُل مُڑھکے بھج گئے جھاک دے ۱۷ عرباں دا جو رونق بھریا سی جگراتا کدھر اے عجمی گیتاں وچ جو سی اک عشق دا کھاتہ کدھر اے چولے پائے فقیراں وی گل کیہ کرنی اے چھڈو جی پھُلّاں نال سی خشبوواں دا جو اک ناطہ، کدھر اے ہر کوئی ایتھے بھجیا پھِردے اپنے محل اُسارن نُوں محل بنا جو پھُوک دوے اوہ عشق دا ماتا کدھر اے اِجڑاں دے اِجڑ پئے لنگھدے رنگ برنگے لوکاں دے جس دِیدے نیں اِکّو دید چ محرم جاتا، کدھر اے چھل سمندر کھیڈ بنا لے رات دنیں بس کھیڈ دا رہئو پُچھ کسے توں کنڈھے دا نہ توں احاطہ کدھر اے نپ رگاں انگور دیاں مے جان کے تازہ لہو پی لے فیر نہ پُچھیں رنداں دا ہے کیہ من بھاتا، کدھر اے اپنی انگلی نال لہویٹ کے رکھ سمے دی ڈوری نوں دیر سویر نوں چھڈ، پلاں وچ ویہل سجاتا، کدھر اے ۱۸ وانگ صبا دے اُٹھ ہُن توں چلّن دا سِکھ طریقہ ہور پھُلاں دے وی پلڑے تائیں کھِچّن دا سِکھ طریقہ ہور کلی دی دلڑی اندر جا بیٹھن دا سکھ طریقہ ہور نہ کوئی ذوق نہ جذبہ فیر وی کمبلی اتے پائی اے تڑپ دے اوس مقام تائیں تے کیتی نہیں رسائی اے شوق دی محفل اندر وی تڑپن دا سِکھ طریقہ ہور آوارہ تے کافر دِل نوں فیر اک واری بنھ کے رکھ کھول اکھاں تک اپنا آپ تے غیراں ولوں نُوٹ لے اکھ ویکھن دا سِکھ ہور تے نہ ویکھن دا سِکھ طریقہ ہور دم کیہ اے؟ بس اک سنیہا توں سُنیا کہ نہیں سُنیا تیری خاک چ عام اک جلوہ اے توں جیہڑا نہیں تکیا ویکھن دا سِکھ ہور تے نالے سُنن دا سِکھ طریقہ ہور اکھ شِکرے دی ہے نہ جگرا باز دا ہے ساڈے پلے مزے اُڈاری دے نہیں لیندے اسیں تے ہاں چڑیاں ورگے اُٹھ نی چڑیے کجھ ہمت کر، اُڈن دا سکھ طریقہ ہور تخت جمشید تے دارا ایویں راہواں وچ نہیں رکھّے نیں ایہ پہاڑ نیں بھارے تے ایہہ ککھاں مول نہیں وکدے نیں لہو دلے دا دے ایہناں نوں کھٹن دا سِکھ طریقہ ہور توں رویا کرلایا، پر تقدیر اوہو رہی جیہڑی سی بنھ کے رکھن والی وی، زنجیر اوہو رہی جیہڑی سی اُداس نراس نہ ہو تے روون دا سِکھ طریقہ ہور توں جل بُجھیا ایں تے چننگ اک جگر دے داغ توں لے لے آپ تڑپ تے اپنی لوہیٹ چ پورے باغ نوں لے لے شعلے وانگوں ککھاں دے وچ کھلرن دا سِکھ طریقہ ہور ۱۹ پوستی غنچے! نرگس اکھ طرحاں تُوں چوکس ہو کے اُٹھ کھلو من دا جھُگا بوجھ غماں دے نال پیا گر دے اُٹھ کھلو پرّاں دی کرلاٹ تے بانگ دیاں واجاں سُن کے اُٹھ کھلو یا فیر اگ بھرے لوکاں دے سُن ہنگامے اُٹھ کھلو اس نیندرما توں نیندرما توں نیندرما توں اُٹھ کھلو اس نیندرما توں اُٹھ کھلو متھے اُتے آن سویر دے سورج نے ہے ٹکّا لایا اپنی رَت جگر دا تُبکا ایہدے کنّیں جُھمکا پایا صحرا، رَوہ، رڑے چوں ہُن قافلیاں اپنا ڈیرہ چایا دنیا تکن والیے اکھے! جاگ پئو تے اُٹھ کھلو اس نیندر ما توں نیندر ما توں نیندر ما توں اُٹھ کھلو اس نیندر ما توں اُٹھ کھلو مشرق سارا انج اے جسراں گھٹا دھوڑ اے راہ دا چُپ دی ہُونگر ڈک کھلوتا پتہ نہیں دیندا ساہ دا بھورا بھورا اس مٹی دا بنّھیا گنڈھ نگاہ دا عراق، سمرقند، ہند، ہمدانوں بُبلی مار کے اُٹھ کھلو اس نیندر ما توں نیندر ما توں نیندر ما توں اُٹھ کھلو اس نیندر ما توں اُٹھ کھلو دریا تیرا کہیا دریا اے پیا سُتا وانگ تھلاں دے دریا تیرا کہیا دریا اے پیا سُکڑے وانگ پلاں دے دریا تیرا کہیا دریا مگر مچھ نہ شور چھلاں دے ایہدے سینیوں پھُٹدی اتھری چھل بن کے اُٹھ کھلو اس نیندرما توں نیندرما توں نیندرما توں اُٹھ کھلو اس نیندرما توں اُٹھ کھلو ایہ نکتہ، سبھ کھول وکھاندا جو اسرار نے اوہلے ملک اے تن مٹی دا جس وچ ہُن، دین دی روح پئی بولے اک دوجے وچ جان دونھاں دی جے اک کنبے دوجا ڈولے سانبھ مصلّے، کمبلی، چُک تلوار تے نیزے اُٹھ کھلو اس نیندرما توں نیندرما توں نیندرما توں اُٹھ کھلو اس نیندرما توں اُٹھ کھلو تُوں امانت دار ازل دی عزت دا ایں تے راکھا تُوں دو جگ دے اُس مالک دا تے، ہیں ویں مان بھروسہ تُوں او مٹی دیا باویا! دھرت، اسمان تے ویلا تُوں مے یقین دی چکھ وہماں دے مندر چھڈ کے اُٹھ کھلو اس نیندرما توں نیندرما توں نیندرما توں اُٹھ کھلو اس نیندرما توں اُٹھ کھلو آہ! ایہ افرنگ سوہرا، من کھچنہار افرنگ آہ! ایناں مٹھڑا تے پرویز عیّار افرنگ دنیا وچ اجاڑے پاندا چنگیز قہّار افرنگ جگ اُسار، پئی جیویں بنائے قبلے، کعبے اُٹھ کھلو اس نیندرما توں نیندرما توں نیندرما توں اُٹھ کھلو اس نیندرما توں اُٹھ کھلو ۲۰ ایہہ جہان ایں مٹی دا تے مٹی دھوڑ اُڑانا میں نہیں جاندا، آندیاں جاندیاں ساہواں کدھر جانا خورے میں غریب دی قبرے کنج دی رات آوے گی چن تاریاں نہ اوتھے ہونا نہ تڑکے منہ وکھانا دل منگتے دیاں تاہنگاں مُکیاں نہ ایہ مکّن دیوے بجلی دا لشکارا یا فِر چنگیاڑا وا بُجھانا شوق نظر، خیال اُچیرا تے فِر ہوند سواد کیہ کہویے پئی راہ وچ کیہڑی دھدّل ڈنگ ٹپانا جنّاں چِر وی جیونا ایں انج جیویے پئی جد مریے مارن والا، موت نوں آکھے، چھڈ دے مرن مرانا ۲۱ بیتے کل تے اج بھلکے دی ہر شے تک دھیان دے نال اوپرا کھاتہ سمجھ نہ ویکھیں اپنا جان گیان دے نال عشق! ویلے دی ڈاچی اُتے کس کجاوا بھین نہیں عاشقی! شام سویر دی گنجھل وچ نہیں پھسن پھسان دے نال ساڈے پِیر نیں دسیا اے پئی دنیا بدلن جوگی نہیں ایہدے مندے چنگے توں ہُن اکھیاں نُوٹ، گمان دے نال دنیا داری چھڈ کے لانبھے ہو جے بہنا چاہنا ایں سبھ توں پہلوں ناطہ توڑ لے اپنی ہوند، پچھان دے نال آکھیا سی میں میرے دل وچ سو سو لات منات وڑے حُکم ہویا پئی بھن چھڈ سارے بسم اللہ رحمن دے نال ۲۲ اسماناں دا کھیڈ تماشہ تکدا پھرے خیال مرا جھُم تاریاں دی گودی وچ کدی چن دے مونڈھے بال مرا ایہہ نہ سمجھیں، خاک گھروندا ای اے کُل جہان ہر ستارا میرا گھر اے ہر اک تارا مال مرا اوہ چاہوے تے کِیڑی نوں اسرار وکھائے سارے کئی ہزاراں نکتے اکھ توں اوہلے رکھدے جال مرا دھرتی کنڈ تے چُکی پھردی بھارے بوجھ پہاڑاں دے ساڈی اِک مُٹھ مٹی نال ای، کہندی ’’بُرا حال مرا‘‘ لالے دے رت بھرے پیالے دے داغاں توں جانیاں میں اوکھے ساہ لے لے کے روون والا ہے اِجمال مِرا ۲۳ کیہ اس گیت قیامت ڈھائی میرے تے، کوئی جانے نہ محفل، تان پورے نوں ویکھے راگنی راگ پچھانے نہ میرے بھانے، عشق اُچیری سوچ توں ڈھیر اُچیرا اے میں ہمیش نہ پُورن ہوواں، چانن، چن بہانے نہ چُپ کر نہ کرلاٹے پا درد وچھوڑے نال نبھا عشق نہ جد تک ہو کے بھر لے من، کھچ ہون فسانے نہ بن چنگیاڑا، راہ وچ آئے ککھاں نوں کر ساڑ سواہ خاکیاں نوں تے جند حیاتی محلاں راہ تکانے نہ توں جَناں شاہین اے چنّاں پالتو چڑیاں نال نہ رہو اُٹھ کے پھنگ کھلار، پئی بھُلیں اپنے طور پرانے نہ جندڑی دے اس رین بسیرے وچ شاعر اک جگنو ایں کدی پراں وچ لَو لشکاندے، کدی پراں نوں تانے نہ غزل اندر اقبال نیں ’’میں‘‘ دی گل اے کھول سنائی جی نواں نواں ایہہ کافر، وڑیا آپ کدی بُت خانے نہ ۲۴ جامِ جم دی نہیں نشانی مے مرے میخانے دی عجم گھڑے وچ رت نچوڑی جگر نیں دل مستانے دی چھل سمندر وانگوں بھوندا پھردا اے جِند کھوجدا اے آدم ہُن تک پھُل نہیں سکیا عیش اوہ عدم زمانے دی وانگ خلیل اللہ دے آئو جادو اس دا توڑیے جی رب بِنا ہر شے پئی جاپے بُت مینوں بُت خانے دی جے کر توں ظہور کریں نہ کائنات دے سینے وچ بڑا ستم اے اکھیاں تائیں چھڈنا کھیڈ کھڈانے دی راہ بھٹک کے بوندلے پھرناں اپنی تھاں سرور دوے خوش آں پئی ایہہ ٹیڈھیاں راہواں تھوہ نہ دین ٹھکانے دی دنیا کھیڈ تماشہ کہہ کے چنگی بھُل وچ پایا اے چنگی بھُل اے، گھڑی گھڑی نہیں لوڑ اے کرم کمانے دی میں بھانویں بُت خانے وچ ای ہُن تک پلیا ودھیا واں ہونٹھاں تے پر گل رہندی سی حرم نوں دل پرتانے دی ۲۵ میں ہاں پھُل تھلاں دا مینوں باگے وچ نہ لائو جنگل بیلے یا پہاڑی وا دے ہتھ پھڑائو میں اپنی مکاری پاروں اپنا آپ اے بھُلیا چارہ کارو! مینوں میری اپنی تھاں اپڑائو میرے سینے وچ جو اکھر لخیا سی، ہُن مٹیا بڈھا ہاں تے فیر کیہ ہویا پھڑ مدرسے پائو چپ چپیتا ساز تے ہاں پر بولی بولداں ہور جیہڑا ایہہ آواز پچھانے اوہدے کنّیں پائو میری رات نوں، سورج دے وچھڑن دا داغ بڑا تسی تے اپنے منگویں چانن دے فانوس ہٹائو میں تے آپ غلاماں نوں گُر بادشاہی دے دسّے بندہ پُر تقصیر ہاں پیشی شاہاں کول کرائو ۲۶ گل نویکلی کیتی میں پر کسے دھیان نہیں دتا جلوہ خون ہویا پئی اکھ نیں اوہنوں مان نہیں دتا پتھر ہو، میں شیشہ گری دے کارخانے چوں لنگھیا ہائے او! پتھر نوں وی کسے کوزے تک جان نہیں دتا توڑ پرانہہ سُٹ ساک پرانے، نویں بناون ٹُر پئے ’لا‘‘ دی انج بھسوڑی پئی ’’الّا‘‘ پڑھان نہیں دتا واہ وا اوس ندی تے تائیں ’’میں میں‘‘ کردی سُک گئی پر دریا نوں اپنے تئیں ہتھ وی لان نہیں دتا کسے کلیم توں سکھ سبق کیوں افرنگ دے دانیاں وچوں ست سمندر چیرن والیاں نوں طور تے جان نہیں دتا عشق نین تڑفن دے سب طور تے میرے دل توں سکِھّے نیں پر کسے پروانے تائیں اوس جلان نہیں دتا ۲۷ عاشق اوہ نہیں جیہڑا ہر دم روندا، کیرنے پاندا اے سچا عاشق تے دونویں جگ تلی دے دھر لیاندا اے عاشق اوہ، جو اپنی دنیا اپنی ڈھب اُساردا اے جگ نال اوہدی نہیں بن دی جگ راہ وچ خار بچھاندا اے جیوندا جاگدا دل نہیں دتا اُس افرنگی دانیاں نوں اوہناںنوں بس سارے منظر اکھیاں تائیں وکھاندا اے عشق بِنا تے عقل وی سپ بن، سوچاں دے ڈنگ ماردی اے حالاں اوہ، ایہہ سونے دا پیالہ لعلاں نال بھراندا اے میری تلچھٹ لے لو کیوں جے ہُن تہاڈے مے خانے وچ اوہ شراب نہیں بن دی، جہدا اک گھُٹ، چن چڑھاندا اے ۲۹ رب دے کولوں اسیں گواچے ہُن پیا ساہنوں لبھّے ساڈی چاہت وچ رہوے تے ساڈیاں تاہنگاں رکھے کدی تریل دے ہنجو، پھُل تے لکھ سنیہا گھلّے کدی پکھیروواں دے سینے وچ کُرلاٹاں بن ہُونگے نرگس پھُل دی اکھ بن کے ساڈا سوہناپا تکّے ایڈا اُچ کرشمہ کارا اکھیاں راہیں بولے آپے ہُن وچھوڑے ساڈے وچ اوہ بھردا اے ہاواں اندر باہر تے اُتے تھلّے پھردا اے چار چوفیرے ۳۰ خالص لعل بناوے رَت مزدور دے نال ایہ مالک صاحب زمینداراں دے ظلم ہتھوں نیں دہقاناں دے کھیت خراب انقلاب …… انقلاب …… اے انقلاب مومناں تائیں، مفتی مُلّاں، تسبی دے پھندے وچ پھاتا سدھے سادھے کافراں وچ، نہیں باہمن دے جنیو دی تاب انقلاب …… انقلاب …… اے انقلاب ڈاہڈے حاکم کھیڈن جوا، موہرے چلن دھوکے نال لوکائی دی جان کڈھیندے پر لوکائی ویکھے خواب انقلاب …… انقلاب …… اے انقلاب آپوں واعِظ وچ مسیتے، پُتّر گھلّے وچ مدرسے ایہ ایانا وچ بڑھاپے اوہ بڈھڑ تھیّا وچ شباب انقلاب …… انقلاب …… اے انقلاب بچو! مسلمانوں، دواں دُہائی علم تے فن دے فتنے کولوں جگ وچ ملے شیطان سُکھالا تے نہ لبھّے رب شتاب انقلاب …… انقلاب …… اے انقلاب تک ذرا باطل دی شوخی، حق دی گھات چ بیٹھی اے رات نوں سورج تے دھاڑے لئی انھّی چام چڑک بے تاب انقلاب …… انقلاب …… اے انقلاب وچ کلیسا، ابنِ مریم، نوں سُولی دِتا ٹنگ سوہنے نبی مہاجر ہوئے، کعبیوں لے کے پاک کتاب انقلاب …… انقلاب …… اے انقلاب ویلے دے پیمانے وچ، میں اج وی ایہو ڈِٹھا اے ایسا زہر کہ جس دے ڈر توں سپ وی کھاندے پیچ و تاب انقلاب …… انقلاب …… اے انقلاب کدی تے اوہ کمزوراں نوں چِیتے دی طاقت دیندا اے خورے کدی فنوس، بلب چوں نکلے باہر شعلے دی چھاپ انقلاب …… انقلاب …… اے انقلاب ۳۱ جاننے آں پئی اک دن اوہنے پردہ لاہ نکلنا ایں ایہ نہ سمجھیں، فیر کلپ کے ساڈا ساہ نکلنا ایں مٹی وچوں جان کڈھن لئی اکو ٹھوکر کافی اے ساز وچوں کُرلاٹ بِنا کیہ گیت چوں، آہ، نکلنا ایں ادّھی راتی ہنجو کیر کے سُکّی بھوئیں نوں وتّر دے تاں سویر نوں سورج دیاں کِرناں پھاہ نکلنا ایں توں کیہ ایں؟ اک بھورا! کدھرے مٹ نہ جائیں ڈرنا واں اپنا من پہاڑ بنا جے سورج ڈاہ نکلنا ایں مٹی چھڈ، تے اپنے آپ نوں مٹی دا پُتلا نہ جان جیکر اپنا سینہ چیریں، اندروں ماہ نکلنا ایں جے کدی اوہ حرم دا بوہا تیرے تے بند کر دیوے درزل اُتے سر ماریں، وچوں لعل ای ٹھاہ نکلنا ایں ۳۲ ہسدیاں کھیڈدیاں چنگا بھیڑا ویلا ڈنگ ٹپا باگ ہووے یا پنجرہ، پھندہ، آہلنا، توں لنگھ جا منیا میں پردیسی ایں توں راہ دا جانو نہیں فیر وی سجن بیلیاں ونگر یار دے بوہے آ اپنے ساہواں نال ای جگ وچ اک بھُچال لیا ویلے وانگ اس گھُنڈ سراں تے اپنی چھاپ وی لا جے کدھرے جبریل تے حوراں واگ پھڑائی منگن من مراد کر پوری، دوواں نوں دلبر یار بنا ۳۳ جندڑی کیہ اے؟ سِپّی وچ پانی نوں لعل بنانا اگ چ اگ وی ہونا پر فیر تن من دھن بچانا عشق اے چڑھ اسماناں تے افلاک تے جھنڈے لانا چن دا سکّہ، پھڑ خلا توں اپنے بوہجے پانا شاہی کیہ اے؟ دین تے دنیا دونواں توں ہتھ دھونا اکو داء وچ دنیا جِت کے عقبیٰ جگ ہر جانا فلسفہ اتے حکمت چنّاں کھیڈ اے ہمت والیاں دی پھڑ تلوار خیالاں والی، دونویں جگ تے چھانا جی داراں دا مذہب کچی نیندرے ویکھیا سُفنا نہیں ایتھوں ای اک لپ مٹی لے کے نواں جہان بنانا ۳۴ میں تے آپ اسمانوں اگے اپنی راہ بنائی تڑکے ویلے آن خیالاں دنیا نویں سجائی باگے دے وچ پا بیٹھا ایں شِکریا آہلنا، ڈر اے پر کَتر کے لے نہ جائے تڑکے دی پُروائی راہ دا گھٹا مٹی بن کے پندھ کدی نہیں مُکیا چھاہ ویلے دی واء نال ٹُریاں منزل نیڑے آئی تاریاں دا جھم چھنڈ، تے نیلی چھتری ہتھ وچ پھڑ لے تاں جے منزل لاگے ہو کے دیوے ہتھ پھڑائی بے پروا دی نور تجلی توں جے ایہہ وکھ ہووے میرے بھانے طُور پہاڑ دا مُل ککھ نہیں بھائی محفل دے آداب اُنھاں دے اکھ نگہ تک لُوسدے نیں ہور کسے دا کیہ دسّاں میں تے آپ اے جان گنوائی میرے مگروں شعر سمجھ کے پڑھن والے ایہ آکھن گے ذات پچھاتے اک بندے نیں دنیا اے چکرائی ۳۵ بِن سیوا جنت نہیں لینی میں عاصی انکھ انا دا ہاں تقصیر مری ابلیسی نہیں غم کھاندا تے شرماندا ہاں ایہ فیض اے عشق دی مستی دا میں اوتھے جا ہتھ پایا اے جگ چانن ونڈدے سورج دی میں اکھ وچ ڈورے پاندا ہاں میں ازل سویر دیاں کرناں توں من موج، بھنور نقشائے نیں جے سہج سمندر نہ منّے طوفان توں کم کراندا ہاں سو وار پہلاں وی اس جگ نوں میں اگ اُتے نچوایا اے میں عشق جوار تے بھاٹے نال سبھ چین سکون جلاندا ہاں پھڑ مالا، بُتّاں دے اگّے میں رج دھمالاں پائیاں نیں تاں کافر کہوا کے مُلّاں توں میں اوس نوں رب لبھاندا ہاں کیہ کہنا ایناں لوکاں دا کدی یار بنن کدی غیر ہوندے کیہ جانن کنج تھلّاں دے وچ بن صید، صیاد بِتاندا ہاں دل سوز توں جسدا خالی اے کجھ کھٹدا نہیں کسے صحبت چوں کر دھخدا تانبا کول مرے تک فیر میں کیہ بناندا ہاں ۳۶ ایہ دنیا انھی دنیا اے دل شیشے ولّوں غافل اے جے ویکھن والی اکھ ہووے تے اوہ رہندی بس دل ول اے کالی رات تے ولویں راہ وچ راہی بے یقینا ایں انج دے قافلے دے راہی لئی مُشکل جیہی مشکل اے؟ عاشق تے بلار نشے وچ، ہوئے رقیب وی مستی وچ فیر کجاویوں باہر سُنی جاندی معشوق دی ہر گل اے کدی پکّا مومن بن دا اے کدی کافر بن کے شک کرے کیہ توڑ کراں مسلمانوں میرا دل تے جھلّا پاگل اے کدی کدی طوفان وی کشتی دے ملّاح بن جاندے نیں میری بیڑی کنڈھے لاون والی وی دریا دی اک چھل اے میں نہیں جاندا من دریا نوں کیہنے ایہہ اکھ دتی اے موتی سینے وچ رکھ کے تے ٹھیکرے سٹ دا کنڈھے ول اے ماڑی قسمت! میری دل دے سوز نے کم وکھایا نہیں اِنج لگدا اے اِکسیر ملی میں جس بھَوں تے اوہ اک تھل اے تیرے دل وچ ہے جے کوئی نواں جہان تے باہر لیا ویکھ افرنگی دی حالت جویں تڑفدا بسمل اے ۳۷ ایتھے یار سجن کوئی جاندا نہیں ایں رنگ ڈھنگ دل نوازی دا توں اپنے آپ وچ گم ہو کے بن راکھا عشق دی بازی دا اوہ کارا سارے کاریاں دا، منگاں منہ وکھالی تے دُکھ دیوے میری اکھیوں اوہلے رَکھ دا اے ہر گُر اوہ کار سازی دا ڈوہنگی گل دے نازک معنیاں دی، رمز ایاز پچھاندا اے کیوں مہر غزنوی دے نال ودھے کجھ ہور وی درد ایازی دا اک ککھ دے مُل ملے تاں وی، اوہ علم تے ناں دانائی لواں جہدے پاروں ڈھال، تلوار ولّوں ہٹے دھیان اے مردِ غازی دا ایہہ مال ملے جس مُل تینوںلے لویں ایہہ سودا نفع دا اے منگ زور تُوں بازوئے حیدرؓ دا، چھڈ کھہڑا منطق رازی دا جے رت دا تُبکا ہے پلّے، اک مُٹھ پَراں دی رکھنا ایں آ میرے کول، سکھا دیواں تینوں ڈھنگ میں فیر شہبازی دا اس فن نوں ساہ دا کم جانیں ایہہ گل تے ہے نادان دی گل رکھ سینے کاٹ تلوار والی جے شوق اے نَے نوازی دا ۳۸ ایہ علم جیہڑا تُوں سِکھنا ایں ایہ چاہندا کوئی نگاہ ناہیں تھک ہارا کسے راہ دا ہے آوارہ ایہ وچ کسے راہ ناہیں ایہ آدم اپنے من وچوں رنگ لے کے جگ نقشاندا ہے ایہ سب سواد اک آہ دا ہے، کجھ نہیں تے سچی آہ ناہیں اک عشق چ پُوری رات پھرے آوارہ ہو کے راہواں وچ اوہ داغ جو سینہ ساڑ دا اے اوہنوں سہن جوگا ایہ ماہ ناہیں اوہدے سوہل ملوک جہے مکھڑے توں میں اپنی اکھ ہٹاندا نہیں انجان پنے دی مستی وچ اوس تکیا اک نگاہ ناہیں اقبال قبا وی پاندا اے کارے جگ دے وی نمٹاندا اے کوئی لازمی وچ فقیری دے پانا گدڑی تے کلاہ ناہیں ۳۹ سرگی اکھ دے سورج جیہی نگاہ اک پیدا کیتی جا سکدی اے خاک سواہ چوں جلوہ گاہ اک پیدا کیتی جا سکدی اے ہیرے وانگ ترِکھّا کر تُوں سوئی دی نوک توں ودھ نگاہ تاں شیشے دے دل چوں راہ اک پیدا کیتی جا سکدی اے باغ بغیچے پنچھیاں دے کرلاٹے تے پابندی اے وانگ کلی دے کھِڑ کے آہ اک پیدا کیتی جا سکدی اے دو جگ رل کے نہیں ڈک سکدے سبھ جلوے نور تجلّی دے جھل سکے جے اکھ، نگاہ اک پیدا کیتی جا سکدی اے بوٹ طرحاں کیوں آہلنے لبھّیں، اُٹھ کھنب جھاڑ، اُڈاری مار چن سورج نوں پھڑن لئی، آہ اک پیدا کیتی جا سکدی اے ۴۰ غیراں دی سنگت وچ بہہ کے مدھرا پیتی مُڑ مُڑ کے منگویں لَو پیمانے وچ توں روشن کر لئی مُڑ مُڑ کے جے مشرق دے ساقی ہتّھوں دو جام گلابی پی لیندوں تاں فر تیری خاک چوں اُٹھدے ہاڑے مستی مُڑ مُڑ کے دل جہڑا وی تاہنگ، تڑپ، کلپن دا جانو ہو جاوے وانگ پتنگے اوہدی جان وی لاٹ تے وجدی مُڑ مُڑ کے سرگی ویلے ہنجو کیر کے جندڑی ہریاں بھریا کر بھوئیں تیری برباد رہوے گی جے نہ سینچی مُڑ مُڑ کے جام گُھما تے افرنگی دے کاریاں دی توں گل نہ کر کئی ہزاراں اِجڑ لنگھے ایس سراں دی مُڑ مُڑ کے ۴۱ لبھ لبھا وچ عشق پیا تے آدم دے ہتھ آیا مٹی پانی دے اوہلے وچ اوہدا جلوہ پایا ایہدوں تے سورج، چن تے تارے وارے جا سکدے نیں اک مُٹھ مٹی جیہدے وچ اے رب نے دل دھڑکایا ۴۲ ویکھو شرق دے وسنیکاں کیہ تازہ نقش بنایا اے چھڈ طواف تُوں اس بُت دے جیہڑا اوہناں توڑ ونجایا اے واہ وا جلوہ اے پئی آپوں دل ویکھن دی لذت لئی راہ دی دُھوڑ چوں وانگ شرارے اُچھل اُچھل کے آیا اے کِتّھے ہے پڑا تورانیاں شہر اُجاڑن والیاں دا جنھاں اپنا سینہ چھِلتر ساہواں نال زخمایا اے تُوں وی اپنی انکھ جگا، پئی آپ طریقت والیاں نیں سارے جگ توں کٹ کے اپنے آپ نوں گاہنڈا لایا اے موئے دلاں لئی کُل جہان ای بس اک بندی خانہ ایں دو ای پیالے چاڑھ کے جہناں جگ توں مُونہہ وٹایا اے اوہ جی دار سواراں دا میں ہتھ بنھ آپ غلام تھیا نیزے نال ای تارا لاہ کے جہناں بوہجے پایا اے سجدے ہور گزارن دی ہُن کتھوں ویہل فرشتیاں نوں ہُن تک اوہناں خاکیاں نوں ای تک تک ڈنگ ٹپایا اے ۴۳ عشق تے مینوں ناز اے ایہنوں غم نہیں ہستی مٹنے دا ایہدے اُتے ذرا اثر نہیں کفر دے طعنے مہنے دا عشق اساں نوں حُکم دوے تے جان پیاری واریے جی عشق ای سبھ کجھ من لِتّا فِر کیہ فیدہ جان دے صرفے دا سومنات جے تکیے تاں فر کافری ہور پکیندی اے بُت خانہ تے آپ پُجاری ہے محمود دے جذبے دا مسجد، مندر، کنشت، سگوں فر گرجا تے مے خانہ سو تھاواں تے دل لایا پر دل نہیں کدھرے لگنے دا اک پہاڑی ندّی کولوں میں گیت الاپنے سِکھے باگے وچوں تے نہیں لبھیا ہاڑا درد گھنے دا میرے کول تُوں آندیاں ہویاں ہاواں، دُھخدا دل لیا تیرے وچ گھڑمس نہیں مچیا ہے دائودی نغمے دا میرے عیب نہ لبھ تُوں میرے جام نال جام ملا روگی جان نہ ہوئے، سواد نہیں فِر کوڑی گُھٹ بھرنے دا ۴۴ ساقی، دل اُتاولے تے ہُن خالص مے پیا سُٹے کیمیا گر اے تاں اکسیر نوںپارے تے پیا سُٹے کیہ جاناں میرے سینے وچ ایہ نور اے یا فِر نار کوئی ایہ جاناں پئی ایہدا چانن، چن پَرے پیا سُٹے میرے دل تے چپ چپیتی فطرت کٹھ پئی کردی اے ساز تے اپنی واج سُنن لئی ناخنے اُتے پیا سُٹے غم نہ کر جے بیلے دے وچ پانی گھٹ پیا دسدا اے راتی اکھ چوں وگدے چشمے دل دریا اُتے پیا سُٹے میرا شِیرہ پیون والیا میرے ڈنگ دا رنج نہ کر کنڈا چُبھ کے، نیندر، اکھیاں چوں کڈھ کے پیا سُٹے ۴۵ خاکیاں دا من چانن، نور فرشتیاں توں ودھ ہونا ایں ساڈے لیکھ ستاریوں، دھرتی، امبراں توں ودھ ہونا ایں میری سوچ دے پالنہار تے ایہ طوفان تے جھکڑ نیں ایہدی تے رفتار فلک دے چکراں توں ودھ ہونا ایں اپنے اندر جھاک حقیقت آدم دی نہ میتھوں پُچھ اکھ دا کنڈا دل وچ کھُب کے دھڑکناں توں ودھ ہونا ایں کدی کدار دی ایویں یبھلی، سچی گل بن جاندی اے خورے رب نوں کیہدیاں یبھلیاں، سچیّاں توں ودھ ہونا ایں ۴۶ شرع دے طور طریقیاں چوں میں اکو نکتہ لبھیا عشق دا منکر کافر ہُندے رب وی ایہو دسیا خاکی فطرت آدم دا اوہ رتبہ لین پچھان ایہ توفیق دے کعبے دے راہیاں نوں ربا سچیا رستہ نہیں جے پُچھدا، میں ہمراہی لبھدا پھرنا واں سانجھی لبھ کے فیر سفر تے جانا ہے کِسے دسیا توں افرنگی چارہ گردی رنگ بازی تے ویکھ رتا رنگ شراب دا، جام عقیقی توں ودھ کر چھڈیا بدید پُنے توں چنگا اے اکھ بے دید کدی رہ جائے اوہ دانش، کیہ کرنی جہنوں دل نہیں سچا منیا فلسفیاں دے گُنجھل کھولدی، عقل سواد اے دیندی پک یقین پر سادا دل دا ڈھیر اگانہہ اے ودھیا فلسفہ اتے کلام، میں دونویں دل تختی توں دھوتے کھوج دے نشتر نال میں بندھن دل دا کھول اے چھڈیا شاہ دوارے ولّے تے میں کنڈ کر کے آں بیٹھا بے توفیقے رب نوں پُوجدا کافر نہیں بن سکیا ۴۷ چھڈ چھڈا کے ہر شے چنّاں دل دلدار ای منگ رب توں انکھ ای منگ، انکھ توں انکھی یار ای منگ اک ادا دے چوبھے نال ای گل تے مُک نہیں جاندی دل، نگہ، عقل لئی، وکھ وکھ، مُکھ سرکار ای منگ جگ دی عشق صراحی جے کر اِکّو ڈیک چ پینی ایں جام نہیں، جمشیدی ہتھ دا چمتکار ای منگ کنڈیاں بھریا رستہ اے تے راہی ننگے پیریں کر سوہنے نوں راضی، کردے بیڑا پار ای منگ جدوں فقیر فقر چ ڈُب کے ات کمال نوں پہنچے اوس شاہی کیہ کرنی، لیندے اوہ دربار ای منگ پندھ حیاتی کس تھاں مُکّے راہ کِدّھر لے جاوے جو بیتی سو بیتی انت اچ خیر، قرار ای منگ دنیاداری وچ کُھب کے جے دل تے چوٹ پوے جام مرا چھڈ ہتھوں، رب توں سچا پیار ای منگ ۴۸ جگ ویہندا ایں! اپنے آپ نوں ویہندا نہیں کد تک جھلّا بن کے کھُنج نوں چھڈنا نہیں نور قدیمی رات نوں روشن کردا اے کدھرے، ہتھ کلیمی، چن تے بنیا نہیں؟ توں اسماناں دے چکراں توں باہر آ جو وی چنگا مندا ایں، تُوں، بھیڑا نہیں دم حیاتی موت دے گل دا پھندہ اے موت شکار اے تیرا، تُوں تے موت دا نہیں رب نے بخشی جان کدی نہیں واپس منگی بے یقینی ماردی، بندہ مردا نہیں مونہہ سِر نک بنان دی جاچ توں میتھوں سِکھ نہیں تے مُڑ کے جمن دا کوئی فیدہ نہیں ۴۹ کوئی کلپ نہیں حادثے، کالیاں راتاں دی تارے پرتن بن سویر شبراتاں دی اپنی شکل گواچی، پھس گئے جال دے وچ رب رولے گل پے گئی، عشق دیاں باتاں دی دل دیاں ہاواں جگر پئیاں ہُن لُوسدیاں نیں بُلّھاں نوں دس پا نہ من سوغاتاں دی ساقی کولوں منگ، مے خانے لبھنی نہیں مُلّاں کول رُشنائی نور دواتاں دی دل نوں چین نہیں ملدا ہے دلدار بِناں کرے تلاوت یا دئے بانگ صلاتاں دی ۵۰ کون ایں تُوں تے کتھوں دا ہیں؟ تیرا اے اسمان؟ لکھ ہزاراں تارے راہ وچ اکھیاں پئے وچھان کیہ دساں؟ توں کیہ کیتا اے، کیہ ہُن بنیا بیٹھوں محمود دی ویکھ ایازی پاروں جگر اے لہولہان توں نہیں اوہ جیہدے پیریں وچھیا تارے جھُم مصلّے توں صوفی، شاعر دی مدھ توں کر لئی وکھ پچھان تیری سوچ اُدھاری لے افرنگ نیں گُنجھل کھولے تیری مستی دُونی کرن لئی، تینوں ہور پیان میں حیران آں عمل ترازو لاون دی گل کرنے جیہڑی قیامت ٹُٹی کَھلی اے اوس توں ہیں انجان اوہ خوش بخت نصیباں والا جسدے سینے کعبہ اکھ جھپکدیاں ہو گیا اوہدے لیکھے دا بھگتان نہیں اِتبار اے مکتب دا نہ مے خانے دا مینوں گھسی گھسائی بھوئیں کردی اے سجدیاں دا اتمان ۵۱ شوق دے شہر دی مٹی وی تے درد اشنائی ہوندی اے ذرے ذرے وچ نیکاں دی جان سمائی ہوندی اے دارو گیر دی مے بالاں دے ہتھوں لے کے کیہ پینی اک نگہ وچ جام صراحی دی بھروائی ہوندی اے جھل پُنے دے جوش نوں سُرت سمھالا دے جائیں تاں گل اے پاٹے لیڑے پان والے دی جگ ہنسائی ہوندی اے ۵۲ مے پرانی، دلبر سوہناں شے ای نہیں من اکھیاں نوں جنت حوراں شے ای نہیں ایتھے کوئی نہیں پکّیاں، سبھ نے ڈھے جانے بھوں، پہاڑ، سمندر، واواں شے ای نہیں مغرب دی دانائی مشرق دے گنجھل پیچ بُتّاں دا بُت خانے گھمناں شے ای نہیں اپنا آپ سیہان اُجاڑ نہ ڈر کے لنگھ توں رہنا بس، باقی چیزاں شے ای نہیں پلکاں نال جو پدّھر کردا پھرناں واں منزل، قافلے تے ایہہ راہواں شے ای نہیں ۵۳ مست قلندر پانی مٹی تابع کردے رہندے شاہاں کولوں باج وصولن گدڑی پائی رکھدے محفل اندر نال کمنداں چن سورج نوں وَلدے کلّیاں ہون تے جھولی وچ زمان، مکان نیں ہوندے خوشی اکٹھ وچ، سِر توں پیراں تک ریشم ای ریشم پِڑ بجھے تے حق دی خاطر تن من دھن نے بھُلدے نواں نظام، اوہ دو رنگے اسمان نوں دیون بخش بودے تاریاں دا جنازہ مونڈھے چُکی پھردے ویلے شاہ نے، بھَلکے دے جد مُکھ توں گھُنڈ سرکایا سجّن کل دی پیتی ہوئی دی مستی وچ مستیندے کُھل کے نہیں ساں کہہ سکدے جو گل، لباں تے آئی میں حیران آں شہر دے مفتی چپ نیں، کجھ نہیں کہندے ۵۴ دو دستی تلوار سی میں، اسمان نے ننگیاں کیتا سان تے لا کے فیر زمانے اُتے سونت اے چھڈیا میں جہان خیالاں دا ساں، ازلی فطرت مینوں بُلبُل تے پھُلّاں دے جگ وچ بھن تروڑ اے سُٹیا جیہڑی اتھری مدھرا نال میں تیرا پیالہ بھریا میرا جام صراحی ایس شراب نیں ہے پگھلایا سینے دے وچ میں ساہ گُھٹ بیٹھاں حرم دے پنچھی والی تاں میری توں واج دی گرمی پاروں آن پچھاتا کُھنڈ پرانے بابیاں دی سوچاں دی بیڑی ڈُبی بچ رہوے گا، جیہڑا میرے بیڑے دے وچ بیٹھا ۵۵ من چنگیاڑے نال میں ذرّے دے تن نوں گرماندا ہاں گرمی، سیک پُچا کے فِر میں اُڈنے لئی پر لاندا ہاں میری واج دے سوز دے نال تے پتھر پانی ہوندا اے وانگ تریل میں اوہ پھُلّاں دے کنّاں وچ ٹپکاندا ہاں میں اک خاص مقام تے بہ کے مٹھڑے گیت الاپے نیں سہج سویر بنن دی، رات دے من وچ، تاہنگ جگاندا ہاں فیر گواچے یوسف دے مُکھڑے توں گُھنڈ چُک کے میں ماڑیاں نوں وی بولی وچ بیٹھن دا ذوق دواندا ہاں تاب ازماندے عشق نیں آپیوں باہری ہُندی مٹی نوں دتے بھِجّے نین، تے میں پیا دید سواد چکھاندا ہاں ۵۷ لالے دے پھُل وانگ تہاڈے باگیں بلن چراگ مرے عجمی جوانو! تہاڈی، اپنی سونہہ چا آکھاں، بھاگ مرے میں تے جند نمانی دا ایہ سوچ سمندر تریا اے تہاڈے من دی بھبھل وچوں تاں ہتھ آئی آگ مرے چن سورج کیہ، میریاں نظراں، تاریاں دا جھُم چیر گئیاں تاہڈا کفرستان بنایا تاں کعبہ، دھن بھاگ مرے ایہناں دی چُنجھ تیز کرن لئی میں گِچّی توں نپدا ہاں تہاڈے من وچ بھخدیاں چننگاں جاپدیاں مینوں کاگ مرے میری رانگلی سوچ نے شرق دے خالی ہتھ نوں نذر کیتے تہاڈے لعل بدخشانی دے ٹوٹے سنگ سُبھاگ مرے بندی خانے دی موری نال اکھ لا کے میں تکیا اے سبھ زنجیراں توڑ غلام وی، بن جاون گے باگھ، مرے اوہ مٹی دے باویو! میرے لاگے آ کے سیک لوو تہاڈے وڈکیاں دی اگ پاروں سینے بلدے داگ مرے ۵۶ انکھ دوارے میل کھڑا، ایہ دس اے، نارسائیاں دی تُوں درداں دا جانو تینوں لوڑ نہیں اشنائیاں دی کد تک جا جا شاہاں دی چوکھٹ تے متھا رگڑیں گا اپنے رب توں ناز ادا سِکھ سوہنیا، کبریائیاں دی پیار محبت کھیڈ جے پُگ دی، جواں مردی دے نال ککھ وی مُل نہ پیندا، قدر نہ رہندی دلبریائیاں دی اوہدے دوارے انج دا دُکھّاں بھریا گیت اک گایا میں درد وچھوڑے دی لذت وچ رَل گئی پِیڑ جُدائیاں دی لیون والا انھّا ویکھ کے مان کراں اپنے تے عشق کٹاپا چڑھیا، گھٹ مانگ ہتھوں اَن ہنڈیائیاں دی چلو دھمالاں پائیے نالے رج کے دارو چاڑھیے عاشقاں لئی حلال اے کڈھنی جان پارسائیاں دی مسلماناں نوں چھڈ توں سوہنیا مسلمانی وچ آ مسلماناں تے لت پا لئی اے کافر کارروائیاں دی ۵۸ ساہ تے میرا سدا بہاری واواں وانگ بنایا گھاہ نوں، میرے ہنجوواں نال اے چنبا کر مہکایا پھُل صحرائی لالے دا میری خالص رَت پی پھُٹیا رتیّ لال شراب دا جسراں پیالہ بھرا بھرایا میں اُڈارو انجدا ہاں پئی اُچے انبراں اُتے نوریاں کئی ہزار وراں مینوں پھڑنے لئی پھندا لایا مٹی دے اس باوے دی وڈیائی کیہ میں دسّاں ایہہ دھرتی نوں انج سجائے جُوں رب اسمان سجایا میں تے اپنا دیوا اس لئی بالیا کہ ہتھ موسیٰ دا بھلے زمانیاں نے صدیاں دی بُکّل وچ لُکایا سجدے پے جا، اتے سہارا شاہاں توں نہ منگ ساڈے وڈ وڈیریاں، اوکھا ویلا انج لنگھایا ۵۹ چھڈ عقل، کجھ تکدی نہیں گل ہور دی ہور بنا آوے اس دید سواد تے چکھیا نہیں سگوں دِسدی گَل لُکا آوے شاعر اتے حکیم، فقیہہ میں گلّاں سبھ دیاں سُنیاں نیں بہت اُچیرے رُکھ، جنھّاں تے پھُل نہ کوئی پتّہ آوے بُت خانے دا وڈا پُجاری جلوے تے مان کریندا اے کالیاں راتاں ونڈدا پھردا، نہیں چاہندا نور سویرا آوے ساڈا رب دے نال گلہ، ساڈے ہوٹھاں اُتے آندا نہیں جو ساڈے دل دی پونجی لے، یوسف ولّوں ٹرخا آوے بُت خانے یا حرم چ مینوں انج دا ساقی ملیا نہیں جو چِننگاں جھولی پان دی تھاں، چنگیاڑا ہتھ پھڑا آوے ۶۰ خورے ایس اُجاڑ چوں کوئی قافلہ پیا لنگھدا اے ورہیاں مگروں سارباناں دا گیت سنائی دتا اے فرعون دے بندی خانے چوں اک یوسف باہر لیاون لئی سارا مال متاع وی لگ جائے، تاں وی، لانا بن دا اے ۶۱ واہ ندانا! افرنگی توں غم خواری دی آس اے لائی؟ دسّ، پنجے پھاتے پنچھی لئی کدی شِکرے دید وکھائی؟ پیو دے ورثے وچوں تینوں، لعل ملے، تے شرم کریں اپنے ہتھیں پتھر کٹ کے، لعل کڈھن جہی خوشی نہ کائی جگ دے رہنے نہ رہنے دی گل کیہ مینوں دسدے او ہُن تک ایہو سنیا، جانیا، کِسے کھیڈ سمجھ نہ آئی مے خانے وچ پئی صراحی پڑتالی توں کنبدی اے پر اک جام اے عاشق دا، جِنوں ویکھ کے پتھر کنبیا ای توں انکھ نوں اوہلا آکھیں، کہہ لے پر اک گل دسناواں اوہلے دا گھُنڈ چُک نہ بیٹھیں، ہے اکھیاں جھولی، تنگ پائی کُھنڈ پرانی ٹہنی دی جس چھاویں تُوں پر کڈھے ہن پت جھڑاں وچ اوتھوں، آہلنا چُک کے، نسنا ہے ننگیائی آکھ غزل کوئی اِنج دی فطرت اپنے سازاں تے گاوے اوہ کیہ شاعر؟ جہنے ایہدے سُر وچ سُر ملائی ۶۲ شرقی، غربی چھڈ توں انج دے جادو ٹونے وچ نہ پئو اس نویں پرانے رنگ دا مُل نہیں پیندا بھائیا اک جَو جکھڑاں دے رستے وچ ڈِگے ککھ دا ککھ وی نہیں رہندا بھانویں اوہ سکندر ہووے دارا، کیقباد، خسرو جندڑی دی اس محفل دی راکھی وی جند نمانی ایں قافلے نال او ٹُردیا راہیا! سبھ نال رہ کے، وکھرا رہئو تینوں تے اس سورج کولوں ڈھیراں ودھ چمکایا اے تاں جے ذرّے ذرّے دے وچ جاوے جند حیاتی لَو توں ابلیس دے اگیّ جیہڑا مان دا موتی ہاریا اے جے جبرئیل دے کول توں رکھدوں ہوندا نہ فِر کوئی دھرو ساڈی تھوڑ دلی پاروں ای مے خانہ بدنام تھیا پھڑ سیانیاں وانگ پیالہ، گھُٹ گھُٹ پی، تے راہے پَئو ۶۳ جگ وچ کھلرے رنگ خشبو دے بارے آکھیں راز ہے ایہ؟ تار حیاتی چھیڑ کے دس، پئی ناخچہ ایں تُوں، ساز ہے ایہ ہر شے دے وچ یار دا جلوہ ویکھ کے اکھ شرماندی اے تاں پیا مینوں آکھیں اوہلا، آڑ، سگوں مجاز ہے ایہ کھچ تُوں ڈوری، چار چوفیرے تانے نیلے پردے دی پاک پوتر ننگی اکھ تے، کُھل جاون لئی، راز ہے ایہ میری بھوں دی مٹی مینوں جنت توں ودھ چنگی اے تھاں ایں، ذوق تے شوق مرے دی درد دلے دا ساز ہے ایہ اپنا آپ گواچ بہواں، کدی ویلا ہتھوں ٹھاہل بہواں دو ویلے جد ہتھ آون، تے تھوہ نہ پئے کیہ راز ہے ایہ ۶۴ داگ وچھوڑیوں دل بن بیٹھا باگ دُکھاں دا ہریا وے صحرائی لالے دے پھُل! کیہ میں دسّاں اڑیا چنگے وچ اُجاڑ دے بہہ کے کلّیاں رونا پِٹنا کیہ کرئیے پر لوکاں تائیں کم وی اے سِر چڑھیا ۶۵ من دیاں اکھیاں کھول جدوں پھُل لالے دا وچّوں تکیا ایہدا سارا ذوق تے شوق ہے رون براتا تکیا ہیٹھ اُتانہہ کُل عالم وچ اے پت حیاتی والی وادی، ٹبہ، صحرا ایسے ہونی کجیا تکیا ساڈے وچوں ہے حیاتی نہ اسیں حیاتی وچوں خورے کیہ اے جند حیاتی ہے کیہڑی جاتی وچوں ۶۶ ایہ دنیا جہان ایں اوہ اگلا جہاں کنارا اِتھاں ہے نہ کنڈھا اُتھاں ہیں دونوں خیال اتے دونوں گماں چنگیاڑا من دا پیا چھڈے دھواں گھڑی پل دی ایہ کھیڈ دو پل دی اوہ سدا ایتھے رہنا ایں توں ای مناں دنیا وی کھوٹی، اگانہہ وی اے کھوٹ مرا پاک باطن ہے سکّہ رواں ایہ جگ سراں ہے تاں اوہ وی سراں نہ رہنا اِتھاں ہے نہ رہنا اُتھاں نہ ایہ جگ کم دا نہ اُو ہے کسے کم رو رو گزاراں ہوکے بھردا مراں ایہ من وی ڈاکو تے اوہ من وی چور ایہ دل دا زیاں اوتھے اُکّا زیاں دو دیوے بالاں تے فر پھُوک ساڑاں ایہ پنجرہ مرا ہے تے اوہ آہلناں ۶۷ آئی بہار تے لالے دے پھُل مُکھ، نال اکھ دُھخاندی اے ٹوٹے ٹوٹے دل دیاں کرلاٹاں ہور پواندی اے رت رنگا اک مے ترونکا لا باگے دی مٹی نوں تک خزاں دے ڈر توں نرگس کنے روپ وٹاندی اے دنیا تائیں جانن والیا اپنے آپ دا دل پچھان اس چن نوں آفاق دا ٹبّر بننے دی گل بھاندی اے ۶۸ اوہ صورت گر جو رات دنے دیاں شکلاں پیا بناندا اے ایہدے اُہدے نقش اُسار کے اپنی دید کراندا اے صوفی جی! کدی گھپ ہنیرے حجریوں، باہر وی پیر دھرو فطرت دا بپاری تکّو چھابہ کسراں لاندا اے سورج، چن، ستارے، پھُٹدی پَو تے اُہدے نال سویر جلویاں دا ایہ ڈھیر دِلے دی اکھ خریدنی چاہندا اے ۶۹ بڈھے ٹھیرے جگ نوں فیر جوان تے ہونا چاہیدا سی ککھوں ہولے دا کوئی بھارا مان تے ہونا چاہیدا سی مُٹھ بھر مٹی، ہر لُکی شے، ویکھن لئی اکھ لبھ لئی اے جگر، ضمیر نوں ہنجوواں دا اشنان تے ہونا چاہیدا سی ہنڈے ہنڈائے چن سورج کدی توڑ و توڑ پُچاندے نہیں نواں ستارا اس جگ دے اسمان تے ہونا چاہیدا سی جہڑی وی تصویر مری کوئی اکھیاں اگے آندی اے من موہنی ایں، ہور ذرا جند جان تے ہونا چاہیدا سی رب سوہنے جد آکھیا سب کجھ انجے ای اے بس چپ کر رہو آدم عرض گزاری، رب رحمان تے ہونا چاہیدا سی ۷۰ باگاں دے پھُل، رنگ، خشبو نال، جان پچھان نہ رکھدے سن موتیاں ورگی نرگس اکھ وچ، منظر، جان نہ رکھدے سن ساہ لیندی ایہ مٹی وی، ساہ لیندیاں نظر نہ آندی سی قافلے جند حیاتی دے کوئی پر، پران نہ رکھدے سن ویلے رکھی، نہ رنداں دی تیہہ، تریہہ دی ہوش کدی جام، صراحی، مدھرا چکھدے ہوٹھ، زبان نہ رکھدے سن عشق دے گونگے ہون دا شکوہ رکھیا طور تجلی نیں وادیٔ ایمن وچ جو منظر طالبان نہ رکھدے سن عشق سُنی جو دھانہہ اساں دی تاہیوں رولا پایا اے چُپ دی محفلے رولا غولا ہیچ مدان نہ رکھدے سن ۷۱ ڈھیر پرانے بُت خانے وچ رولا کیہنے پایا اے ونجھلی وانگ پُجاریاں نوں وی رون پٹن تے لایا اے کسے فقیر دی جھگی ہووے یا فر محل امیراں دے روگ جوانی نوں اوہ لگّے جہناں لک جھکایا اے ایہہ کیہ دارو؟ جیہڑا پیڑاں درداں ہور ودھاندا اے دانش، جان کے، حیلے کردی یا اس تے ٹونا سایا اے ہڑ دے زور بنا تے بندیا تیری بیڑی کھہندی نہیں ایویں لوکاں مانجھی دے نال جھگڑا جھیڑا پایا اے قصہ پندھ حیاتی والا نہ ای پُچھ تے چنگا اے پیڑاں، درد وچھوڑے جھل، گا غزلاں، ڈنگ ٹپایا اے تڑکے دی میں ٹھنڈی وا وچ اپنی ٹھنڈی ہا ملائی پھُلّاں اُتے پیر نہ دھریا، باگ دا پھیرا لایا اے محل مناریاں توں وکھ رہ کے محل منارے گھمیا واں جگ سراں دا رج نظارا چن جہی اکھ کرایا اے ۷۲ بلدے دیوے، لالے دے پھُل، بیلے، باگ پہاڑاں وچ بھیت حیاتی پاناں ایں تے جھاک تُوں من دیاں غاراں وچ رنگ اساں دے پھِکّے پئے نہ خشبو ساڈی مُکّی اے ساڈا بہن کھلون اے سوہنا، دل، دماغ بزاراں وچ مستی مے وچ ہوندی اے کوئی خالی پیالے وچ تے نہیں بِن پیالیوں پی نہیں ہوندی بہ کے اَوپرے یاراں وچ کالی رات ہنیری وچ کوئی انجدا سینے داغ جلا جہدی لَو بِنا پچھانیاں جائے نہ دل وی، پیاراں وچ اوئے جھلّیے اگّے! رکھ دے سینہ کھول کے وا اگّے منگ نہ چھِٹ تریل دی چنّاں، بُجھے نہ اگ گلزاراں وچ ۷۳ ہاں بندہ آزاد جیہا ہے عشق امام مرا عقل غلام مری ہے سائیں عشق امام مرا محفل وچ اے غل غپاڑا میرے جام دے گھمنے نال ایہ وے شام دا لشکن تارا، ماہِ تمام مرا تاہنگوں باہجھ، عدم وچ واہوا، میری جند سوکھالی سی دل، مستی وچ ہاڑے کردے، تک کے دام مرا میرے دل چوں ظاہر ہو اوہ فیر ایتھے ای لُکیا اے آڑ، مقام اے اس دا سائیں، ظہور مقام مرا ۷۴ گھٹ کُوندی سی ڈوڈی، خورے دل وچ راز کوئی لُکیا سی پھُل پھلواڑی دے کٹھ وچ وی محرم دا غم کھاہدا سی اوہنے، باگ دے پنچھی، وا بہار دی سنگت منگی سی تکیہ کیتا اوہناں تے جو جاندے ای بس اڈنا سی ۷۵ کیوں نہ اپنے آپ نُوں پُوجاں، مندر اوہ نہ کعبہ اوہ عرب تے عجم سراں دا وی تے نقشہ نہیں جے لگدا اوہ اک لالے دا پھُل کیہ، سارے پھُلّاں دے رنگ اُڈے نیں باگ دے پنکھ پکھیروواں دے وی گیتاں وچ نہیں ہاڑا اوہ چار چفیرے ویکھ لیا اے نقش نواں کوئی دِسدا نہیں لگدے، فطری صنعت وچ نہیں نقشہ نواں بناندا اوہ عرشی رَتھ دے تاریاں وچ بدلاوے دا کوئی ذوق ای نہیں خورے رات دنیں دی نس بھج دا وی نہیں یبھ خانہ اوہ بن منزل آرام نیں کردے بے طلبے، بے آسے لوک خورے خاکیاں دے سینے وچ ساہ ست نہیں جے بچیا اوہ یا کدھرے اِمکان کتابے کورا کاغذ بچیا نہیں یا انج اے، بئی قلم قضا دا، اکھّر نہیں لکھ سکدا، اوہ